Qazaq radıosyna 99 jyl: Ardagerler efırge shyǵady
QR Aqparat jáne qoǵamdyq damý mınıstri Aıda Balaevanyń aıtýynsha, Qazaq radıosynyń halyqqa arnaǵan ózindik syıy bar.
ıAǵnı, bıylǵy 1 qazan kúngi baǵdarlamalardy radıo ardagerleri - Uljan Parmashqyzy, Saýyq Jaqanova, Amanjan Eńsebaıuly, Búrkit Bekmaǵambetov, Qusman Igisinov, Kúlásh Moldahmetova, Ábdiráli Bólebaı, Nurjan Jalaýqyzy júrgizetin bolady.
Atap aıtqanda, satırık Kópen Ámirbek «Qaıyrly tańda» tyńdarmanǵa tamasha kóńil-kúı syılasa, barqyt únniń ıesi Saýyq Jaqanova «Jyrlaıdy júrek» habaryn júrgizedi. Al Búrkit Bekmaǵambetov, Amanjan Eńsebaıuly jáne Ábdiráli Bólebaı syndy dıktorlar jańalyqtar jarshysy bolyp, elimizdegi jáne jahandaǵy sońǵy aqparatpen tanystyrady. Kúlásh Moldahmetova balalarǵa arnalǵan «Tapqyr bala» habaryn tikeleı efırde júrgizse, Qusman Igisinov «Túrki álemi» baǵdarlamasyn daıyndaıdy. Nurjan Muhamedjanova «Armandastar» habarynyń tizginin ustaıdy. Radıomyzdyń taǵy bir top ardager jýrnalısteri «Dostyq», «Biz janbasaq», «Radıomedıtsına», «Aq tilek» habaryn jurt nazaryna usynady.
«Keler jyly ǵasyrlyq merekesin atap ótetin, táýlik boıy boıy habar taratatyn elimizdiń birinshi radıosyn tyńdap óstim, tyńdap kelemin. Onyń ústine, Saýyq apamyzdyń ertegilerin, Amanjan aǵanyń qońyr únin estip eseıgen urpaqtyń biri retinde bul tartýdy erekshe qabyldadym. Qazaq radıosy únemi qosýly bolsyn!», - dep jazdy Facebook-te mınıstr.
Al «QAZAQ RADIOLARY» JShS Bas dırektory Ernur Býrahannyń aıtýynsha, «Qazaq radıosynyń» ǵasyrlyq mereıtoıyn atap ótý – «saǵyndyrǵan daýys ıeleri» aǵa býyn ókilderiniń osylaısha efırmen qaıta qaýyshýymen bastalady.
Alǵash 1921 jyldyń kúzinde Ult ustazy Ahmet Baıtursynulynyń bastamasymen Orynbor qalasynan habar taratqan, ǵasyr kýási bolǵan qara shańyraq, ár qoǵamnyń tusynda árqalaı damyp, ýaqyt ótken saıyn zaman talabyna saı jańǵyrdy.
Qazir quramyna 4 birdeı (Qazaq radiosy, Shalqar, Astana, Classic) radıony biriktirgen QAZAQ RADIOLARY seriktestigi búkil qazaq dalasyna aqparat taratady.
Qazaq radiosy pandemııaǵa beıimdelip, eldiń áleýmettik, quqyqtyq taqyryptardaǵy qajetin óteýge birjolata den qoıdy. Al Shalqar bolsa, taza ulttyq baǵyttaǵy tanym, tarıh pen paıym-parasattyń ózegine aınaldy.
Qazir «Qazaq radiosy» respýblıkanyń 89% aýmaǵyna tarasa, al «Shalqar» radıosyn eldiń 64% tyńdaıdy. «Jol kartasyna» sáıkes 2025 jylǵa qaraı onyń deńgeıin 95%-ǵa jetkizý josparlanǵan. Qazir osy maqsatta shekaralyq aımaqtarda radıosıgnaldyń qamtý deńgeıin keńeıtýge qatysty birqatar jumystar qolǵa alyndy.
