Qazaq radıosy - jańa maýsymda
ASTANA. 23 qyrkúıek. QazAqparat - Aldaǵy 1 qazanda áýe tolqynyna Astanadan shyqqanyna 1 jyl tolatyn «Qazaqstan» RTRK» AQ júıesindegi Qazaq radıosy men «Shalqar» radıosy Qazaqstan Respýblıkasynyń memlekettik saıasatynyń negizgi baǵyttaryn nasıhattap, júıeli túrde aqparattyq qoldaý kórsetip keledi.
Qazaq radıosy baǵdarlamalary negizinen qazaq jáne orys tilderinde, sondaı-aq Qazaqstanda turatyn ózge ult ókilderiniń tilderinde (túrik, nemis, tatar, koreı, uıǵyr, ázerbaıjan) júrgizedi. El turǵyndarynyń 88,74 % osy arnanyń habarlaryn 24 saǵat boıy tyńdaýǵa múmkindigi bar. Al «Shalqar» ulttyq arnasy kún saıyn 18 saǵattan ádemi áýen men ulttyq múdde turǵysyndaǵy mazmundy habarlar usynady. «Shalqardy» el turǵyndarynyń 62,04 paıyzy tyńdaı alady.
Qazaq radıosynyń negizgi mindeti - memlekettik aqparattyq saıasatty júrgizý jónindegi tapsyrysty oryndap, efırdegi sóz arqyly Táýelsiz Qazaqstannyń elimizdegi jáne álemdik qaýymdastyqtaǵy jańa, san qyrly bet-beınesin qalyptastyrý. Qazaq radıosy óziniń tarıhı aqparattyq boryshyn oryndaı otyryp, memlekettik saıasatty elimiz turǵyndaryna, al qazaqstandyqtardyń pikirleri men ustanymdaryn bılik tizginin ustap otyrǵan qurylymdarǵa ońtaıly jáne shuǵyl jetkizýdiń kópiri bolyp qala beredi.
Qazaq radıosy sózderdiń saýatty aıtylýyna, til tazalyǵyna jáne til mádenıetine erekshe kóńil bólip keledi. Radıojýrnalısterdiń kásibı deńgeıi olardyń qazaq tiliniń leksıkalyq baılyǵyn paıdalana otyryp, efırdi erkin meńgerýinen de baıqaýǵa bolady. Oǵan mysal retinde «Zııaly qaýym», «Іnjý-marjan», «Álqıssa» habarlaryn, «Armandastar» jáne «Zamandas» baǵdarlamalaryn t.b. aıtýǵa bolady. Sondaı-aq, «Qaıyrly tań, Qazaq eli!», «Táýlik tynysy», «Aıtóbel», «Narıdirgen», «Elim meniń», «Ushqyn» jastar baǵdarlamalarynda da ulttyń mańyzdy máseleleri keńinen sóz bolady.
QR Prezıdenti N.Nazarbaevtyń «Qazaqstan-2050» Strategııasy - qalyptasqan memlekettiń jańa saıası baǵyty» atty Joldaýynda júktelgen máselelerdiń el aýmaǵynda oryndalý barysy týraly «Qazaqstan-2050», «Jańa Qazaqstan», «Sheshim qabyldandy», «EKSPO-2017», t.b habarlarynda júıeli túrde áńgimelenip keledi.
QR Memlekettik hatshysy M.Tájınniń ulttyq tarıhty qaıta zerdeleý jónindegi tapsyrmasyna oraı quzyrly organdardyń atqarǵan jumystary men jalpy tól tarıhymyzǵa jańasha kózqaras turǵysynan da kóptegen habarlar men aıdarlar ashyldy. «Men - qazaqpyn!», «Tarıh tolqynynda», «Ulttyń jany - ult tarıhy», «Zamana zańǵarlary», «Istorıcheskıe zametkı», t.b. habarlarynda ulttyq tarıh máseleleri sóz bolyp jatqanyn qulaǵy túrik tyńdaýshylardyń ózderi de baıqaýy múmkin.
"Budan basqa Qazaq radıosy respýblıka radıotyńdaýshylarynyń kóp bóligin qamtyp qana qoımaı, odan tysqary jerlerge de, Reseı men Qytaıdyń, Ózbekstan men Qyrǵystannyń shekaralyq aımaqtaryna jetedi. Sondaı-aq, «Shalqar» ulttyq arnasynyń habarlary elimizdiń iri qalalaryna taratylady. Al qazirgi kezde ınternettegi paraqshamyz arqyly http://kazradio.kz/ teleradıokorporatsııa qurylymyndaǵy Qazaq radıosynyń, «Shalqar», «Astana» jáne «Klassık» radıolarynyń habarlaryn on-laın rejıminde tyńdaýǵa bolady. Biz ár saǵattyń basynda qazaq tilinde jáne ár saǵattyń ortasynda orys tilinde beriletin jańalyqtar toptamasyna aıryqsha kóńil bólemiz. Al «Altyn qor» atty altyn kómbemiz óz aldyna bir tóbe", - dedi Qazaq radıosynyń bas redaktory Ońǵar Quralov. .
