Qazaq radıosy efırden maıdanger aqyn-jazýshylardyń Altyn qordaǵy daýystaryn beredi

NUR-SULTAN. QazAqparat - Qalam men qarýdy qatar ustap, qandy qyrǵynǵa qatysqandardyń ishinde qazaqtyń aqyn-jazýshylary az emes. Jeńis kúni qarsańynda maıdanger aqyn-jazýshylardyń qalamynan týǵan shyǵarmalardy dáriptep, Altyn qordaǵy daýysyn tyńdarmanǵa jetkizý maqsatynda «Qazaq radıosy jańa joba usynbaq.

«Batyrlar rýhyna taǵzym» atty on kúndik baǵdarlamalar toptamasy aıasynda 1-10 mamyr aralyǵynda kún saıyn saǵat 17:45-te Qazaq radıosynyń áýe tolqynynan arnaıy habarlar beriledi.

«Batyrlar rýhyna taǵzym» habarynan qazaq qyzdarynyń arasynan shyqqan tuńǵysh ushqysh Hyıýaz (Hıýaz) Dospanovanyń, poezııa men soǵys qaharmany Hamıt Erǵalıevtiń, otty jyldardy óleńmen órgen Syrbaı Máýlenovtiń, maıdannyń aldyńǵy shebinde án salǵan Roza Baǵlanovanyń, qyryqqa jýyq kitap jazǵan soǵys ardageri Qalmuqan Isabaevtyń, Mánshúk jaıly jyr avtory Ázilhan Nurshaıyqovtyń syr-suhbattaryn, soǵys jaıly ózderi aıtqan estelikterin tyńdaı alasyzdar.

«Men qazaqpyn» dep jyrlaǵan Juban Moldaǵalıev pen áıgili partızan Qasym Qaısenovtiń de erterekte Altyn qorǵa jazyp alynǵan ún taspalary áýe tolqynynan taratylady. Áıgili «Soldat soǵysqa ketti» avtobıografııalyq romanynyń avtory, jazýshy, soǵys ardageri Kemel Toqaev týraly Ábilfaıyz Ydyrysovtyń Altyn qordaǵy esteligi men Ábý Sársenbaevtyń maıdan jyrlary efırden berilip, batyrlarymyz tyńdarmanmen qaıta qaýyshady.

«Jeńisti jaqyndatqan jandardyń erligin qurmettep, rýhyna taǵzym etý urapaqqa júktelgen zor mindet. Ekinshi dúnıejúzilik soǵystyń aıaqtalǵanyna bıyl 75 jyl. Osynsha ýaqyt ótse de qan maıdannyń surapyl kúnderi talaı júrekterde syzat qaldyryp, qanshama shańyraqty ortasyna túsirgeni eshqashan umytylmaıdy. Soǵysqa attanǵan 1 mıllıon 200 otandasymyzdyń jartysyna jýyǵy urys dalasynda qaza tapty, elde qalǵandary tylda eńbek etti, 500-den astam qazaqstandyq Keńes odaǵynyń batyry atandy»,- delingen Qazaq radıolary taratqan aqparatta.

Foto: www.facebook.com/qazaqradiosy