Qazaq radıosy aldaǵy ýaqytta da bıikten tabylady - Nurjan Muhamedjanova
ASTANA. QazAqparat - Astanadaǵy «Qazmedıa ortalyǵynda» Qazaq radıosynyń 95 jyldyǵyna oraı «Halyqaralyq baılanystar ornatýdaǵy radıonyń róli» atty ǵylymı-tájirıbelik konferentsııa ótýde.
«Qurmetti qonaqtar, Qazaq radıosynyń ardagerleri jáne áriptester! Elimizdegi elektrondy aqparat quraldarynyń qarashańyraǵy - Qazaq radıosynyń efırge shyqqanynyń 95 jyldyǵy Qazaqstan Respýblıkasy Táýelsizdiginiń 25 jyldyǵymen tuspa-tus kelip otyr. Osy qos merekemen barshańyzdy quttyqtaımyn! Táýlik boıy efırge shyǵatyn Qazaq radıosy aýdıtorııasynyń aýqymy jaǵynan Qazaqstandaǵy radıostantsııalardyń ishindegi absolıýtti kóshbasshy. Qazaq radıosynyń bıylǵy merekelik jyly Buqaralyq aqparat qyzmetkerleri kúnine oraı Qazaqstan Respýblıkasy Prezıdenti Nursultan Nazarbaevtyń Alǵys hatymen marapattalýy ujymnyń eńbegine berilgen joǵary baǵa dep bilemiz. Radıomyz aldaǵy ýaqytta da osy bıikten tabylady dep senemiz. Endeshe, memlekettiń áýe tolqynyndaǵy úni asqaqtaı bersin! Qazaq radıosynyń 95 jyldyq toıy qutty bolsyn!», - dedi «Qazaqstan» RTRK» AQ Basqarma tóraıymy Nurjan Muhamedjanova.
Óz kezeginde Jýrnalıstıka máselelerin zertteý ınstıtýtynyń dırektory, fılologııa ǵylymdarynyń doktory, professor Namazaly Omashev ǵasyrǵa jýyq ýaqyt aıasynda Qazaq radıosy talaı tarıhty bastan ótkergenin atap ótti. Osy retti ol Qazaq radıosy - barsha qazaqtyń rýhanı tiregi ekenin aıtty.
«Keshegi ótken ómirimizde, búgingi baǵyndyrǵan bıikterimizde bolsyn salt-dástúrimiz ben ult rýhanııatyn ulyqtaý jolynda, eldik máseleni kún tártibine qoıa bilýde, aqparattyq zamanda qoǵamdyq pikirdi durys jetkize bilýde Qazaq radıosynyń eńbegi zor», - dedi N. Omashev.
Aıta keteıik, sharaǵa memleket jáne qoǵam qaıratkerleri, zııaly qaýym ókilderi, otandyq BAQ jetekshileri men ardager jýrnalıster, sonymen qatar, Qazaq radıosymen áriptestik baılanys ornatqan sheteldik teleradıo mekemeleriniń jetekshileri qatysýda.
Túp-tórkini sonaý 1921 jyldyń qazan aıynan bastalatyn Qazaq radıosy talaı tarıhty bastan ótkerdi. Sol kezden bastap Orynbor qalasynan búkil respýblıkaǵa tarala bastady. Qazaq radıosy habarlardy birtindep taqyryp boıynsha toptastyrdy, derbes jáne tektes aqparattarǵa bólý nátıjesinde jýrnalıstik elekten ótkizdi. Sóıtip, respýblıkalyq efırden úndeýler, shaqyrýlar, derekter, nusqaýlar, málimetter, jańalyqtar úzbeı jıi beriletin boldy. 1926 jyldyń 3 qazanynan bastap Qyzylorda qalasynda Qazaq radıosy óz habarlaryn turaqty berýdi odan ári jalǵastyrdy. Almaty radıostantsııasy 1931 jyly 1 mamyrda ashyldy. 30-shy jyldar Qazaq radıosynyń damý jyldary boldy.
Radıojýrnalıstıka jolǵa qoıylyp, radıo buqaralyq aqparat quraldarynyń biri retinde nyǵaıyp, bekidi. Búginde Qazaq radıosy táýlik boıy 9 tilde habar taratady: qazaq, orys, nemis, aǵylshyn, koreı, uıǵyr, ázerbaıjan, túrik jáne tatar tilinde. Aptasyna 148 habar efırge shyǵady.
