Qazaq radıosy Beıjińnen habar taratqanyna 54 jyl boldy - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Beıjińdegi qazaq radıosy habar taratqanyna 54 jyl boldy - CNR
Bıyl Qytaıdyń Ortalyq radıo-televızııa bas stantsııasynyń ulttyq tildegi baǵdarlamasy áýe tolqynyna kóterilgendiginiń 75 jyldyǵy. Al Ortalyq radıo-televızııa bas stantsııasynyń qazaq tildegi radıosynyń Beıjińnen sóılegenine tup-týra 54 jyl boldy. Osy jyldarda ujym jumysynda mańyzdy tarıh, erekshe estelikter jatyr, dep jazady Qytaıdyń Ortalyq halyq radıosynyń resmı saıty.
Bul merekelik is-sharaǵa oraı birneshe aptadan beri Ortalyq halyq radıosy saıty «Men jáne qazaq radıosy» degen taqyrypta tyńdarmandardyń jeliles estelikterin jarııalap kele jatqan bolatyn.
Osy aptada Ortalyq radıo-televızııa bas stantsııasynyń ulttyq tildegi baǵdarlamalary taratylǵandyǵynyń jáne jańa Qytaı ulttyq radıo isteri dúnıege kelgendiginiń 75 jyldyǵyna oraı arnaıy konferentsııa ótti.
Atap aıtqanda, 22 mamyr kúni Ortalyq radıostantsııasynyń ulttyq tildegi baǵdarlamalary áýe tolqynyna kóterilgendiginiń jáne jańa Qytaı ulttyq radıo isteri dúnıege kelgeniniń 75 jyldyǵy jónindegi konferentsııa Beıjińde ashyldy. Osy arnaıy is-sharaǵa Ortalyq Úgit bólimi bastyǵynyń orynbasary, Ortalyq radıo-televızııa bas stantsııasynyń bastyǵy Shyn Haıshıýn qatysyp, sóz sóıledi.
Memlekettik Ult isteri komıtetiniń arnaýly múshesi Chın Ijy, QHR Úgit bóliminiń bastyǵy Ýan Haıjoý arnaıy qatysqan.
Ortalyq ulttar ýnıversıteti, Tarıh-mádenıet kolledjiniń professory Myn Man, qazaq tilindegi baǵdarlamanyń tyńdarmandar ókili, tanymal jazýshy Erkesh Qurmanbekqyzy, ulttyq tildegi baǵdarlamalar ortalyǵynan zeınetke shyqqan ardager jýrnalıster jáne jas qyzmetkerler jınalysqa qatysty.
Aıta keteıik, Ortalyq halyq radıosynyń qazaq tilindegi bólimi 1971 jyly 1 mamyrdan bastap áýe tolqynyna kóterilgen. Alǵashynda «Juńııań (Ortalyq) halyq radıo stantsııasy, Beıjińnen sóılep turmyz» dep bastalatyn Qabykesh Sálıyquly men Nurqaıshanyń úni kúni búginge deıin tyńdarmandardyń sanasynda saqtalyp qaldy. Odan keıin, Qyzyrbek Janasyluly, Sáýle Daǵaıqyzy, Balapan Áripjanuly, Gúlnar Soltansháripqyzy, Ardaq Ábıdenqyzy qatarly dıktorlardyń aıshyqty úni, el esinde erekshe qalǵan. Sondaı-aq Rádil Jaýdatuly, Serik Raqymuly, Qaınar Tasqynuly, Erkebulan Mútánuly qatarly jastardyń qońyr daýysy, Nurzııa Jumaqanqyzy, Shynar Ǵalymqyzy, Gúljan Zarqynbekqyzy sııaqty efır tizgindeýshilerdiń atyn aıtpaı ketý múmkin emes, deıdi Ortalyq halyq radıosy.
Atalǵan BAQ-tyń dereginshe, Jý Baýchýan, Saǵat Jaıpaquly, Nyǵmetqalı Nuǵymanuly, Badymjap Olje, Qabykesh Sálıyquly qatarly aǵa býyn aýdarmashy-dıktorlardyń qajyrly eńbegimen jumys bastaǵan ortalyq halyq radıo stantsııasynyń qazaq radıo ujymy bir jaǵadan bas, bir jeńnen qol shyǵaryp, qyzmetti tyńǵylyqty isteýiniń arqasynda, qazaq radıosy birtindep damý jolyna qadam basady.
- Radıodaǵy ýaqyt alǵashqy jarty saǵattan bir saǵatqa, keıin eki saǵattan tórt saǵatqa, tórt saǵattan jeti saǵatqa ulǵaıady. 2015-jyly 1 qańtardan bastap, táýligine 18 saǵat ártúrli mazmundaǵy radıo baǵdarlamalaryn taratyp, zamanǵa saı ujym barǵan saıyn kemeldengen. Úrimjiden redaktsııa bólimshesin ashyp, jalyndy jastarmen qataryn tolyqtap, halyqtyń qulaq quryshyn qandyryp keledi, - dep jazady qytaılyq BAQ.
Aıta ketý kerek, Ortalyq halyq radıostantsııasy menshigindegi Qytaı ulttar radıo saıty qytaı, mońǵol, tıbet, uıǵyr, qazaq, koreı tilderinde aqparat taratady.
Ózbekstan men Qazaqstan IT salasyndaǵy yntymaqtastyqty nyǵaıtady – ÓzA
Aqparattyq tehnologııalar zamanaýı ekonomıkanyń qozǵaýshy kúshine aınalyp otyrǵan tusta, bul saladaǵy halyqaralyq áriptestik erekshe mańyzǵa ıe. Osyǵan oraı Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev bastaǵan delegatsııa Ózbekstannyń Tsıfrlyq tehnologııalar mınıstrligine jáne IT Park tehnoparkine resmı saparmen keldi.
Bul týraly apta sońynda ózbekstandyq «ÓzA» aqparat agenttigi habarlady.
Habarlamada aıtylýynsha, sapar aıasynda mınıstr Sherzod Shermatov pen Qazaqstan delegatsııasy arasynda ekijaqty seriktestikti tereńdetýge baǵyttalǵan resmı kezdesý ótti. Taraptar IT salasyndaǵy ortaq basym baǵyttar boıynsha pikir almasyp, naqty bastamalardy talqylady.
Ózbekstandyq BAQ-tyń dereginshe, kelissózder barysynda kelesi máselelerge erekshe nazar aýdaryldy: shekaraaralyq telekommýnıkatsııa qyzmetterin jaqsartý, IT kompanııalardyń ónimderin halyqaralyq naryqqa shyǵarý, qyzmet eksportynyń kólemin arttyrý, eki eldiń tehnoparkteri arasyndaǵy yntymaqtastyqty keńeıtý.
Beıjińde Nurǵısa Tilendıevtiń 100 jyldyq mereıtoıyna arnalǵan «Nurǵısa-Álqıssa» atty kontsert ótti – «Halyq gazeti»
21 mamyr kúni Qytaıdyń astanasy Beıjiń qalasynda Qazaqstannyń kórnekti kompozıtory, kúıshi, dırıjer Nurǵısa Tilendıevtiń 100 jyldyq mereıtoıyna arnalǵan «Nurǵısa-Álqıssa» atty mereıtoılyq kontsert ótti, dep habarlaıdy Qytaıdyń «Halyq gazeti» basylymy.
Qytaılyq BAQ-tyń málimetinshe, mádenı is-sharaǵa Qytaı men Qazaqstan resmı taraptarynyń ókilderi, Qazaqstannyń Qytaıdaǵy Elshisi Shahrat Nuryshev, Shanhaı yntymaqtastyq uıymynyń Bas hatshysy Nurlan Ermekbaev, Almaty oblysynyń ákimi Marat Sultanǵazıev, belgili mýzykanttar, ǵalymdar, eki el arasynda jumys jasaıtyn kompanııa ókilderi qatysqan.
Almaty oblysynyń ákimi Marat Sultanǵazıev Qytaıda Qazaqstannyń uly kúıshisiniń mereıtoıyn atap ótýdi Qytaı-Qazaqstan eki el dostyǵynyń kýási sanaıtynyn aıtqan.
Aıta keteıik, Nurǵısa Tilendıev atyndaǵy «Otyrar sazy» Qazaqstan memlekettik akademııalyq folklorlyq-etnografııalyq halyq aspaptary orkestri jınalǵan jurtshylyqqa án men kúıden shashý shashty. Kontsertte «Alataý», «Kele jatyr qus qaıtyp», «Kýə bol», «Sarjaılaý» syndy tamasha ánder oryndaldy.
Til jáne óner Iran men Qazaqstan arasyndaǵy mádenı yntymaqtastyq jolyndaǵy baılanys kópirleri - Parstoday
Tehrannyń Mádenıet jáne ıslamdyq baǵdar mınıstri Qazaqstannyń Tehrandaǵy elshisimen kezdesýinde, Iran men Qazaqstannyń eki eliniń mádenı jáne tarıhı uqsastyqtary kóp ekenin aıtty.
Sondaı-aq Irannyń Mádenıet jáne ıslamdyq baǵdar mınıstri Abbas Salehı eki elde Iran men Qazaqstannyń mádenı aptalyqtarynyń ótkizilýin quptaǵan. Onyń aıtýynsha, Iranda jyl saıyn 80-nen 100-ge deıin kórkem fılm shyǵarylady, kıno salasynda ózara túsinistik memorandýmynyń jasalýy Qazaqstanmen yntymaqtastyqtaǵy maqsattarymyzǵa jetýimizge kómektesedi.
Bul týraly osy aptada ırandyq Parstoday aqparat agenttigi habarlaǵan.
Salehı Farabıdi fılosofııa álemindegi Iran men Qazaqstan degen eki halyqty baılanystyrýda tıimdi bolatyn baılanystyrýshy núkte retinde atady. Ol Irandaǵy farabıtaný boıynsha múmkindik zor, óıtkeni Irandaǵy fılosofııalyq aǵym úzilissiz jalǵasty, sondyqtan Irandaǵy farabıtaný salasynda jaqsy jumys isteýge bolatynyn aıtqan.
Sonymen qatar Salehı tildiń eki el arasynda kópir bola alatynyna jáne til biliminiń mańyzdy sala bolatynyna nazar aýdarǵan. Onyń pikirinshe, osy sala boıynsha, ónerdi de osy baǵytta qarastyrýǵa bolady. Mysaly, klassıkalyq, zamanaýı jáne aımaqtyq mýzyka salalarynda ortaq qarym-qatynas jasaý úshin mańyzdy salalar bar eken.
Sondaı-aq osy aptada ParsToday basylymynda «Iranda hrıstıandyqqa ruqsat etilgen be?» degen taqyryptaǵy aqparat jaryq kórdi. Atalǵan shaǵyn maqala «Iranda hrıstıandyqqa ruqsat etilgen be?» degen suraqpen bastalǵan.
Irandyq basylymda bul suraqtyń jaýabyn ırandyq hrıstıan qaýymdarynyń kúndelikti ómirinen izdeýge bolatyny aıtylady. Sonymen qatar tarıhı shirkeýler ılahı dinderdiń beıbit qatar ómir súrýiniń sımvoly retinde meshitterdiń janynda ornalasqany tilge tıek etiledi.
ParsToday agenttiginiń habarlaýynsha, keıbir sheteldik BAQ-tyń pikirine qaramastan, ırandyq hrıstıandar teń quqyqty azamattar retinde tanylyp qana qoımaı, eldiń saıası qurylymynda belsendi ustanymǵa ıe eken. Bul týraly tolyǵyraq atalǵan maqaladan oqýǵa bolady.
VII Etnosport festıvali dástúrdi, otbasyn jáne jahandyq birlikti jańǵyrtady - TRT
Ystanbýldaǵy Atatúrik áýejaıynda osy aptada 7-shi Etnosport mádenıet festıvali bastaldy. Bul shara dástúrli oıyndar, mýzyka jáne ortaq adamgershilik qundylyqtardy kórsetken túrli tústi rásimmen ashyldy.
Bul týraly senbi kúni Túrkııa Radıo Televızııa portaly habarlady.
Atalǵan BAQ-tyń keltirgen málimetterine súıensek, Álemdik Etnosport Konfederatsııasy (WEC) uıymdastyrǵan bul tórt kúndik shara 22 mamyrda bastalyp, 25 mamyrda aıaqtalady. Festıvalge 35 elden 1000-nan astam sportshy qatysyp, ortaq mádenı murany jańǵyrtyp jatyr.
Bıylǵy festıvaldiń «Dástúr otbasynan bastalady» degen taqyryby Túrkııa Prezıdenti Rejep Taıyp Erdoǵannyń 2025 jyldy «Otbasy jyly» dep jarııalaýymen úndesedi.
TRT-nyń dereginshe, óner qoıylymdary, ınteraktıvti sheberlik sabaqtary jáne mádenı kórmeler arqyly festıval tarıhı qundylyqtardyń zamanaýı álemde qalaı jańǵyrtylatynyn kórsetetin tiri kýálikke aınaldy.
Álemdik Etnosport Konfederatsııasynyń prezıdenti Bılal Erdoǵan ashylý saltanatynda festıvaldiń keń aýqymdy mıssııasyn atap ótip, mádenı murany saqtaý ulttyq jáne jahandyq jaýapkershilik ekenin aıtqan.