Qazaq-polıak kompanııasy Jambyl oblysynda jemis baqtaryn ósiredi
TARAZ. QazAqparat -Jambyl oblysynda 2015 jyldan bastap joǵary tehnologııalar negizinde jemis baqtary damytylyp keledi, dep habarlaıdy «QazAqparat» HAA tilshisi.
Tarazda ótken «Qazaqstan baq sharýashylyǵynyń bolashaǵy» ІІ ǵylymı-tájirıbelik halyqaralyq agroforýmynda «FTC Equity» Polsha-Qazaqstan birlesken kompanııasy júzege asyryp jatqan «Qulan agroparki» baq ósirý jobasy tanystyryldy. Sharada Polsha, Qazaqstan, Italııa elderiniń ǵalymdary men kásipkerleri baq sharýashylyǵynyń qazirgi tehnologııalary, tamshylatyp sýarý, zııankestermen kúres ádisteri sııaqty ózekti máselelerdi talqylady.
«Qulan agroparki» Rysqulov aýdanynyń aýmaǵynda ornalasatyn bolady. Myń gektardan astam aýmaqqa ıntensıvti alma baqtary men súıekti jemis-jıdekterdi ósirý, jemisti jáne butaly ósimdikter tálimbaqtaryn salyp, jemisterdi saqtaý men óńdeýge qajetti búkil ınfraqurylym júıesin qalyptastyrý josparlanyp otyr. Joba aıasynda jylyna 50 myń tonna baqsha ónimi shyǵarylyp, eki júzden astam jańa jumys orny ashylady.
Jobany júzege asyrý úshin 620 mln teńgeden astam ınvestıtsııa quıylmaq. Ónimder negizinen Qazaqstan men Reseı naryǵyna jol tartady.
Forým aıasynda tabıǵaty tamasha Rysqulov aýdanynyń týrızm áleýetin arttyrý máselesi de qaraldy.
QR Aýyl sharýashylyǵy mınıstrligi baspasóz qyzmetiniń habarlaýynsha, qarasha aıynyń basynda Jambyl oblysynyń T.Rysqulov aýdanynda ornalasqan «Qulan» agroparkinde 100 gektar aýmaqqa shıe aǵashtarynyń alǵashqy kóshetteri otyrǵyzyla bastady. Eldegi eń úlken shıe baýy jylyna 1680 tonna ónim berip, 50 adamdy jumyspen qamtıtyn bolady. Jalpy «Qulan» agroparki 15 ınvestıtsııalyq jobany biriktiredi.
Aıta keteıik, 13 jeltoqsan kúni Astanada Ekonomıkalyq yntymaqtastyq jónindegi úkimetaralyq komıssııa aıasynda kólik salasyndaǵy yntymaqtastyq jónindegi Qazaqstan-Polsha jumys tobynyń II otyrysy bolady. Otyrysta konteınerlik tasymaldardy damytý salasynda Dostyq/Altynkól-Brest-Dostyq/Altynkól ýchaskesinde konteınerlik poıyzdardy qabyldaý-ótkizý boıynsha birlesken tehnologııany ázirleý máselesi kelisiledi dep kútilýde. Sonymen qatar, konteınerlik poıyzdardy tehnologııalyq óńdeý ýaqytyn qysqartý múmkindigi de qarastyrylady.
