Qazaq poezııasynyń on tomdyq antologııasy jaryqqa shyqty!

Osy oraıda, erteń, 4 aqpan kúni saǵat 15.00-de Qazaqstan Respýblıkasynyń Ulttyq kitaphanasynda tanystyrylym rásimi ótedi.

«Mereke baspasy» Atyraý oblysy ákimdiginiń tapsyrysymen jáne qoldaýymen «Jyr marjany» atty on tomdyq qazaq poezııasynyń antologııasyn jaryqqa shyǵardy. Qazaq kitap basý tarıhynda tuńǵysh ret 1977 jyly eki tomdyq qazaq sovet poezııasynyń antologııasy jáne belgili ádebıetshi Saýytbek Ábdirahmanov qurastyrǵan (2007 jyl, «Rarıtet» baspasy) eki tomdyq antologııadan basqa buryn-sońdy qazaq halqynyń arǵy tarıhynan belgili baba jyraýdan bastap búgingi jas talanttarǵa deıin meılinshe tolyq qamtylǵan kólemdi 10 tomdyq antologııa oqyrman qolyna tıgen emes.

10 tomdyqtyń І tomy uly babamyz tasqa qashap jazyp ketken danyshpandyq jyrlary men túrik qaǵanatyn qurǵan Qutylyǵ qaǵannyń uly Kúltegin qaǵannyń el shejiresinen bastalady. Kúltegin murasynyń erkin ádebı nusqasyn jasaǵan aqyn Temirhan Medetbek.

«Qazaq aqyndarynyń basyn qurap, on tomdyq jınaq shyǵarý jóninde Atyraý oblysynyń ákimi Baqtyqoja Іzmuhambetov bastama jasaǵan bolatyn. Sodan keıin aqyndardyń shyǵarmalaryn jınaý, irikteý, baspaǵa daıyndaý jóninde kóptegen jumystar jasaldy. Sonyń nátıjesinde tuńǵysh ret osyndaı on tomdyq jaryqqa shyǵyp otyr. Onda qazaq tarıhyndaǵy jyraýlardan bastap qazirgi aqyndardyń basym bóligi qamtyldy. Bul kólemdi jınaq ómirden ótip ketken jyr jampozdaryna kórsetilgen erekshe qurmet dep esepteımiz. Sondaı-aq búgingi tańda ár óńirde júrgen aqyndarǵa da jasalǵan úlken qoldaý bolady dep oılaımyn»,- dedi belgili qalamger, atalǵan antologııany qurastyrýshy Mereke Qulkenov.

Osy on tomdyq jınaqtyń qazaq poezııasyn zertteýshi ǵalymdar men synshylarǵa da zor paıdasy tıetini anyq. Jyr súıer qaýym úshin de rýhanı baılyq bolmaq.

678 aqynnyń basyn qosyp, 3000 danamen jaryq kórgen osynaý jyr jádigeriniń ár tomy kórkem bezendirilip, ár aqynnyń beınesi sýretshiniń qylqalamymen salynǵan. Bul jınaqtan sýretshi Altaı Aıtjanov qoltańbasyn kóremiz. Antologııany qurastyrǵandar Mereke Qulkenov pen Gúlsim Muqysheva. Alǵysózin jazǵan aqyn Temirhan Medetbek.

Mereke Qulkenovtiń aıtýynsha, on tomdyq antologııanyń tanystyrylym rásimine aqyndar, sondaı-aq ómirden ótip ketken Juban, Ǵafý, Qadyr, Tumanbaı jáne basqa jyr sańlaqtarynyń jubaılary shaqyrylyp otyr.