Qazaq pen tájik halqynyń arasynda kóp uqsastyq bar - Ýmar Shonazarov
Biz elimizde turyp jatqan túrli ulttardyń etnosaralyq birligi men ózara tatýlyǵy týraly kóp aıtamyz. Alaıda, keıde osynaý aýqymdy uǵymdardyń qarapaıym adamdar arasyndaǵy dostyqtan bastalatynyn eskere bermeımiz. Eldiń birligi aǵa men ininiń, kórshi-qolań, týǵan-týystyń arasyndaǵy ózara yntymaq pen ystyq yqylastan bastaý alady. Bul jerde bir ǵana qarapaıym qaǵıda bar. Ol - adamdardyń bir-birine meıirimmen qaraýy. Bizdiń basty keıipkerimiz Ýmar Shonazarov osy tujyrymdy óziniń ómirlik qaǵıdasyna aınaldyrǵan.
«Men óz kásibimniń aıasy keńeıgen saıyn el-jurttyń aldyndaǵy jaýapkershiligim artqandaı sezinemin. Adamdy adam etetin onyń adamgershilik qasıetteri ǵana. Búgingi naryqtyq ekonomıka jaǵdaıynda memleket barsha halyqtyń turmysyn teń etip jasap bere almaıdy. Alaıda, elimizde aýqatty adamdar barshylyq qoı. Solar áleýmettik turǵydan az qamtylǵan bir otbasyn bolsyn, qanatynyń astyna alsa, elde kedeılik, teńsizdik degen uǵym boı kórsetpes dep oılaımyn», - deıdi ol.
Elimizde koronavırýs ınfektsııasynyń taralýyna baılanysty engizilgen tótenshe jaǵdaı kezinde Ýmar Shonazarov óziniń áriptesterimen, Qazaqstan halqy assambleıasynyń Aqmola oblystyq fılıalynyń jáne «Nur Otan» partııasynyń oblystyq fılıaly «Jas Otan» jastar qanatynyń múshelerimen birlesip, «Biz birgemiz» aktsııasy barysynda muqtaj jandarǵa azyq-túlik, dári-dármek jetkizýde belsendilik tanytyp júr.
«Adamǵa aýa jutý men as ishý qandaı qajet bolsa, maǵan qaıyrymdylyq jasaý sondaı qajet. Tótenshe jaǵdaı kezinde ómirdegi basty baılyq - densaýlyǵynan aıyrylǵan, áleýmettik jaǵynan az qamtylǵan, bireýdiń kómegine zárý jandarǵa kómek kórsetýdi azamattyq paryzym dep sanaımyn», - deıdi ol.
Búginde Ýmar Shonazarov týǵan jeri jyraqta bolsa da, Qazaqstandy óz Otany sanaıtyn tájik ultynyń ókilderiniń basyn biriktirip otyrǵan «Sangı-Kabýd» tájik ulttyq-mádenı ortalyǵynyń tóraǵasy. Onyń bastamasymen KHA Aqmola oblystyq fılıalynyń sportshy jastar komandasy qurylǵan, ol ózara aralasatyn, dostasyp júrgen túrli etnostardyń 200-ge jýyq ókilin biriktirgen. Ár ulttyń óziniń tili men mádenıetin damytýyna múmkindik berip otyrǵan olardyń Elbasy men Memleket basshysyna aıtar alǵystary sheksiz.
Aıta keteıik, osy kúni Aqmola oblysynda 18 etnosty biriktiretin 50-ge jýyq etnomádenı birlestik jumys isteıdi. Solardyń biri – «Sangı-Kabýd» tájik ortalyǵy. Atalmysh birlestik 2017 jyldyń qarashasynda ashylǵan. Sodan beri «Jas kelse – iske» demekshi, kásibı sportshy, qazaq, arab, parsy tilderin erkin meńgergen isker jas Ýmar Shonazarovtyń jetekshiligimen tájik ulttyq-mádenı ortalyǵy ashylǵan kúnnen bastap-aq jumysqa qyzý kirisip ketti. Ortalyq músheleri birlesip elimizdegi barlyq merekeni atap ótedi. Túrli ulttardyń ulttyq taǵamdaryn ázirlep, ánderin shyrqap, bılerin bıleıdi.
