Qazaq pen mońǵol kıiz úı mádenıetiniń murageri sanalady
ASTANA. KAZINFORM – Qazaq pen mońǵol kóshpendiler órkenıeti men kıiz úı mádenıetiniń murageri sanalady. Bul týraly Aqordada Mońǵolııa Prezıdenti Ýhnaagıın Hýrelsúhpen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.
- Men bul saparǵa aıryqsha mán berip otyrmyn. Sebebi, Mońǵolııa aımaqtaǵy mańyzdy seriktesimiz, tatý kórshimiz. Bizdiń tarıhymyz ben tamyrymyz ortaq. Eki el de kóshpendiler órkenıeti men kıiz úı mádenıetiniń murageri sanalady. Qos halyqtyń bolmysy men rýhanı dúnıesi, ómir salty men ádet-ǵurpy úndes. Sondyqtan biz bir-birimizge árdaıym tilektes bolyp, jetistikterimizge shynaıy qýanamyz, - dedi Prezıdent.
Memleket basshysy sońǵy jyldary Qazaqstan men Mońǵolııanyń qarym-qatynasy tyń qarqynmen damyp kele jatqanyna nazar aýdartty.
- Osydan 1,5 jyl buryn Mońǵolııaǵa memlekettik saparmen barǵanymdy bilesizder. Qadirli Prezıdent Ýhnaagıın Hýrelsúh myrzanyń jáne barsha mońǵol halqynyń yqylas-iltıpatyn árdaıym rızashylyqpen eske alamyn. Sol sapar barysynda strategııalyq áriptestik týraly deklaratsııaǵa qol qoıdyq. Bul - myń jyldyq baýyrlastyǵymyzdy birjola bekite túsken tarıhı qujat. Qazirgi tańda eki eldiń Parlamentteri men quzyrly mınıstrlikteri tyǵyz baılanys ornatqan. Úkimetaralyq komıssııa jáne iskerlik keńes tabysty jumys istep keledi. Prezıdent Hýrelsúhtyń búgingi sapary osy yntymaqtastyqty nyǵaıta túseri anyq, - dedi Qasym-Jomart Toqaev.
Buǵan deıin Qasym-Jomart Toqaev Aqordada Mońǵolııa Prezıdentin qarsy alǵanyn jazǵan edik.