Qazaq pen qyrǵyzdy ádebı-mádenı baılanys jaqyndata túsedi - Janseıit Túımebaev
Qyrǵyz eliniń astanasy - Bishkek qalasyndaǵy «Ene-Saı» memlekettik rezıdentsııasynda ótken sharaǵa joǵary laýazymdy tulǵalar, memlekettik organ basshylary, respýblıkanyń túkpir-túkpirinen jáne shet memleketten delegattar shaqyrylǵan.
Saltanatty is-sharany Qyrǵyz Respýblıkasynyń Prezıdenti Sooronbaı Jeenbekov sóz sóılep ashty. El prezıdentiniń sózinen keıin kórshiles Reseı, Qazaqstan, Ózbekstan memleketteriniń ókilderi sóz aldy.
Qazaqstan halqy Assambleıasy tóraǵasynyń orynbasary Janseıit Túımebaev óz sózinde kópultty Qyrǵyzstannyń ishki jáne syrtqy saıasatyn azamattarynyń ál-aýqatyn jaqsartýǵa baǵyttap otyrǵanyna toqtaldy. Sondaı-aq, Qyrǵyzstan halqy Assambleıasynyń etnosaralyq ózara is-qımyl jasaýdyń tıimdi ınstıtýtyna jáne birliktiń myzǵymas tuǵyryna aınalǵanyn atap kórsetti.
Janseıit Túımebaev eki el tarıhy men ádebıetinen qazaq-qyrǵyz arasyn jaqyndatatyn mysaldar keltire otyryp, túp-tamyry tereń mádenı baılanystar qos eldi biriktire túsetinine toqtaldy.
«Kóne túrki dáýirinen bastaý alatyn qyrǵyz ádebıeti qaı kezde de qazaq ádebıetimen tyǵyz baılanysta damydy. Ádebıettiń keıbir úlgileriniń eki elde bir mezgilde damýynyń mysaldary óte kóp. Bizdiń Asan Qaıǵy, Ket Buǵa, Aldar kóse, Tolybaı synshy sııaqty tulǵalarymyz da ortaq. Halyq aqyny Aaly Toqombaev óziniń ádebı eńbeginiń alǵashqy kúnderinen bastap Abaıdy ustaz tutyp, uly aqynnyń óleńderin túgelge jýyq qyrǵyz tiline aýdardy», - dep atap ótti Janseıit Qanseıituly.
Qyrǵyz aýyz ádebıetiniń jarqyn úlgisi «Manas» jyrynyń hatqa túsip, saqtalýyna úles qosqan Shoqan Ýálıhanov pen Muhtar Áýezovtiń eńbekteri de eske alyndy. Zańǵar jazýshy Shyńǵys Aıtmatovtyń qazaq aqyn-jazýshylary Qaltaı Muhamedjanov, Muhtar Shahanov, Oljas Súleımenov, Zeınolla Qabdolov, Sherhan Murtazamen dostyq qarym-qatynasyn keıingi býynǵa úlgi etti.
Sonymen qatar, qos memlekettiń assambleıalary arasyndaǵy dostyq, seriktestik qatynastyń qalyptasqany, Qazaqstanda turatyn qyrǵyz etnosyna kórsetilip otyrǵan qoldaý týraly keńinen áńgimeledi. Mysaly, Qazaqstanda 9 etnomádenı birlestik tirkelgeni, jeksenbilik eki mektep jumys isteıtini, olarǵa qajetti oqý quraldarynyń memlekettik bıýdjet esebinen shyǵarylatyny, Qazaqstanda eńbek etip jatqan qyrǵyzdan shyqqan belgili azamattar týraly aqparatty zal qoshemetpen qabyldady.
