Qazaq pen armıan halyqtarynyń uqsastyǵy kóp – Silk Way Star qonaqtary
ASTANA. KAZINFORM – Astanada Silk Way Star halyqaralyq jobasynyń túsirilimi qyzý júrip jatyr. Mýzykalyq shoý 20 qyrkúıekte kórermenderge jol tartpaq. Al mýzykalyq shoýdyń grand-fınaly 22 qarashada Jibek Joly telearnasynda jáne baıqaýǵa qatysýshy elderdiń jetekshi telearnalarynda tikeleı efırde kórsetilmek.
Baıqaýdyń Armenııadan kelgen ádilqazy múshesi Vrej Kırakosıan jáne qatysýshysy Saro Gevorgıan «Búgin LIVE» baǵdarlamasyna suhbat berip, Qazaqstannan alǵan áseri men qos halyqtyń uqsastyqtary týraly aıtyp berdi.
Armenııalyq qonaqtar qazaqtyń ulttyq ashanasyn erekshe jaqsy kóretinin jetkizdi.
– Men Qazaqstanǵa alǵash ret kelip otyrmyn. Bul saparymdy estigen anam mindetti túrde qazaqsha etten dám tatý keregin aıtty. Maǵan bári unap jatyr, osynda kelgenime qýanyshtymyn. Osydan 4 jyl buryn «Jańa tolqyn» baıqaýyna qatysqanymda qazaqstandyq MEZZO tobymen tanysqanmyn. Olarǵa sálem joldaımyn. Sol kezde qazaq halqyna qyzyǵýshylyǵym oıanyp, mádenıetimizde óte kóp uqsastyq baryn baıqadym. Tipti án shyrqaǵanda mılızmatıkamyzǵa deıin uqsaıdy, – deıdi Silk Way Star qatysýshysy Saro Gevorgıan.
Onyń aıtýynsha, Silk Way Star baıqaýy jas ánshilerdiń shyǵarmashylyǵy úshin óte mańyzdy. Munda jańa mádenıetterdi kórip, qazaq tilinde án shyrqaý tájirıbesin alǵan.
– Al meniń Qazaqstanmen dostyǵym sonaý 2013 jyly bastalǵan, meni Astanada ótken «Shattyq» án baıqaýyna tórelik etýge shaqyrǵan bolatyn. Sodan beri aradaǵy qarym-qatynas úzilgen emes. Eki halyqtyń ortaq tusy óte kóp. Qazaqtyń da, armıannyń da halqy qonaqjaı, qyzdary bııazy, daryndy ul-qyzy kóp, qos halyq ta ulan-asyr toı jasaǵandy jaqsy kóredi. Silk Way Star – ár qatysýshy óz ana tilinde sóılep, óz mádenıetin tanyta alatyn álemdegi jalǵyz telejoba. Bul biregeılikke jol ashady, – deıdi qazylar alqasynyń múshesi Vrej Kırakosıan.
Óz kezeginde tájirıbeli ánshi baıqaýdyń jas qatysýshylaryna aqyl-keńesterin berdi jáne talanttardy baǵalaý qalaı júretinin aıtyp berdi.
– Mundaı halyqaralyq baıqaýlarǵa kásibı, myqty ánshiler qatysady. Qazylar alqasy olardyń biregeıligine basa mán berýi kerek. Sıtýatsııaǵa qaraı, ár joly ár túrli qasıetine nazar aýdarýy múmkin. Al qatysýshy barynsha shynaıy bolýy kerek, qazylar da, kórermen de jasandylyqty birden sezedi. Shynaıy júrekten shyqqan óner tyńdarman júregine jol tabady. Óz otandasym Saronyń múmkindigi týraly eshteńe aıta almaımyn. Eń bastysy Armenııany laıyqty deńgeıde kórsete alsa dep tileımin. Jeńimpazdy halyq anyqtaıdy. Biz óz jumysymyzdy ádil ári ashyq jasaýǵa tyrysamyz, – deıdi Vrej Kırakosıan.
Aıta keteıik, Silk Way Star shoýy 20 qyrkúıekten bastap Silk Way, Jibek Joly, Qytaıdyń CCTV-3 arnasynda jáne qatysýshy elderdiń ulttyq arnalarynda kórsetiledi.
QR Prezıdentiniń Teleradıokesheni Prezıdenti men CMG medıakorporatsııasy uıymdastyryp otyrǵan baıqaýǵa 12 el, atap aıtqanda, Ázerbaıjan, Armenııa, Grýzııa, Malaızııa, Qazaqstan, Qytaı, Qyrǵyzstan, Mońǵolııa, Tájikstan, Túrikmenstan, Ózbekstan jáne Ońtústik Koreıa ókilderi qatysady.
Al Qazaqstan atynan ánshi Alem óner kórsetedi.