«Qazaq-ózbek tandemi» termıniniń paıda bolýy beker emes – sarapshy
TAShKENT. KAZINFORM – Sapar barysynda «qazaq-ózbek tandemi» degen termınniń paıda bolýy beker emes. Bul eki memlekettiń jáne jalpy Ortalyq Azııa elderiniń ózara tandemde bolýyn aıǵaqtaıdy. Prezıdent Qasym-Jomart Toqaev pen Ózbekstan basshysy Shavkat Mırzıeev arasynda ótken beıresmı kezdesýge qatysty ózbekstandyq belgili saıasattanýshy Farhod Tolıpov osyndaı pikir bildirdi, dep habarlaıdy Kazinformagenttiginiń Tashkenttegi menshikti tilshisi Álıhan Asqar.
«Memlekettik, resmı jáne jumys saparlarymen qatar, beıresmı kezdesýlerdiń mańyzy zor. Bul tek elder arasyndaǵy ǵana emes, sonymen birge basshylardyń arasyndaǵy dostyqtyń dáleli ispetti. Atalǵan sapar barysynda «qazaq-ózbek tandemi» degen termınniń paıda bolýy da beker emes. Bul eki memlekettiń jáne jalpy Ortalyq Azııa elderiniń tandemde bolýyn aıǵaqtaıdy. Osyǵan deıingi qarym-qatynastyń júıeli ári sapaly damýy ony joǵary deńgeıge jetkizip otyr», - dedi Farhod Tolıpov.
Sarapshy birlese atqarǵan nátıjeli jumystyń arqasynda Qazaqstan men Ózbekstan strategııalyq seriktes deńgeıine biraz ýaqyt buryn shyǵyp úlgergenin atap ótti. Búginde odaqtastyq qarym-qatynastyń irgetasyn bekemdep keledi.
«Beıresmı sapar barysynda Qazaqstan men Ózbekstan arasyndaǵy strategııalyq seriktestik pen odaqtastyqtyń 2034 jylǵa deıingi baǵdarlamasy bekitildi. Bul eki el qarym-qatynasty jańa deńgeıge shyǵaryp, onyń aldaǵy ýaqytta zor múmkindikke ıe ekenin kórip otyr degendi bildiredi. Jalpy Qazaqstan men Ózbekstan Ortalyq Azııanyń ózge elderine úlgi sanalady», - dep oı bólisti saıasattanýshy.
Farhod Tolıpovtyń paıymynsha, álemde qalyptasqan kúrdeli geosaıası jaǵdaıda eki el arasyndaǵy barlyq saladaǵy baılanystardy nyǵaıta túsý óte mańyzdy. Óıtkeni, ózge memleketterde bolyp jatqan jaǵdaılardyń teris saldary Ortalyq Azııa aımaǵynda da sezilýi múmkin. Sondyqtan onyń aldyn alý, bir-birimen kelise otyryp áreket etý oryndy.
«Ortalyq Azııa elderiniń damýynda únemi geosaıası tendentsııalar bolyp otyrǵany belgili. Olar jalǵasa da beredi. Osyndaı kezeńde Qasym-Jomart Toqaev pen Shavkat Mırzıeev odaqtastyqty bekemdep, bolýy múmkin qaterlerge birge qarsy turý úshin tandemde jumys isteýge ýaǵdalasty. Bul rette eki prezıdent qazaq-ózbek baılanystaryn ǵana sóz etken joq. Olar aımaqtaǵy mańyzdy máseleler boıynsha pikir almasty. Ortalyq Azııa – erekshe aımaq, onda eki memlekettiń qarym-qatynasymen máselelerdi sheshe salý qıyn. Munda barlyq eldiń qatysýy mańyzdy», - dep túıindedi F.Tolıpov.
Eske salaıyq, 5 sáýir kúni Qasym-Jomart Toqaev pen Ózbekstan basshysy Shavkat Mırzıeev Hıýa qalasynda beıresmı kezdesý ótkizdi.
Onyń barysynda prezıdentter ózara taýar aınalymyn ulǵaıtý, energetıka, kólik, sý sharýashylyǵy, IT salalaryndaǵy yntymaqtastyqty damytý sııaqty ekonomıkalyq yqpaldastyqtyń san alýan máselesi jóninde pikir almasty.
