Qazaq-ózbek shekarasyndaǵy «B. Qonysbaev» pýnktiniń ótkizý áleýeti artty

ASTANA. QazAqparat – Jóndeýden keıin qaıta ashylǵan Qazaqstan-Ózbekstan shekarasyndaǵy «B. Qonysbaev» pýnktiniń ótkizý áleýeti artty. Bul týraly Ortalyq kommýnıkatsııalar qyzmetindegi brıfıngide Memlekettik kirister komıteti tóraǵasynyń orynbasary Baqytjan Slıamov málim etti, dep habarlaıdy QazAqparat tilshisi.

«2020 jyly bıýdjet qarajaty esebinen «B. Qonysbaev» avtomobıl ótkizý pýnkti jańartylyp, aýmaǵy 3,6 gektardan 6 gektarǵa deıin keńeıtildi. Bul – qazaq-ózbek shekarasyndaǵy eń iri pýnkterdiń biri. Qurylysqa arnalǵan ınvestıtsııalyq shyǵyndar shamamen 15 mlrd teńge boldy. Pýnkt táýligine 1,5 myń kólik quralyn jáne 10 myń jeke tulǵany qozǵalystyń eki baǵytynda, onyń ishinde 1 myń júk kóligin jáne 500-ge deıin jolaýshylar kóligin ótkizýge qaýqarly. Munda 2019 jyldyń jeltoqsanynan bastap 2022 jylǵy qazanǵa deıin 230 525 kólik quraly ótti. Odan 3 248 mln teńgeden astam kedendik baj ben salyq tústi», - dep toqtaldy Baqytjan Slıamov.

Aıta keteıik, bıyl 1 jeltoqsannan bastap Ózbekstan men Qazaqstan arasyndaǵy «Qaplanbek» jáne «Zangıota» avtomobıl ótkizý pýnkteri jóndeýge jabylady. Baqytjan Slıamovtyń aıtýynsha, jóndeý josparlanyp otyrǵan qalǵan ótkizý beketteri jabylmaıdy, degenmen kólik pen jeke tulǵalardyń qozǵalysyna shekteýler engiziledi.

Eske salsaq, bıyl shekaradaǵy 9 avtomobıl jáne 1 temirjol ótkizý pýnkti jóndeledi.