Qazaq-ózbek shekarasynda júk kólikteriniń «úımelep» qalýyna ne sebep
Vedomstvo málimetinshe, mundaı jaǵdaı aǵymdaǵy jyldyń naýryz aıynan beri baıqalyp otyr.
«Ózbekstan Respýblıkasynyń taıaý jáne alys shet eldermen syrtqy saýda-sattyǵynyń damýyna baılanysty Qazaqstan aýmaǵy arqyly Ózbekstan Respýblıkasy baǵytyndaǵy taýar aǵymynyń aıtarlyqtaı ulǵaıýy baıqalady. Osyǵan baılanysty Qazaqstan tarapynan «B.Qonysbaev» ótkizý beketine ótkizý aldynda 50-den 100-ge deıingi júk kólikteriniń jınalyp qalýy bastaldy. «B.Qonysbaev» beketiniń ótkizý qabileti táýligine 150 avtokólik quralyn quraıdy. Keden beketi kúsheıtilgen táýliktik rejimde jumys isteýde jáne óziniń ótkizý qabileti sheginen asyra táýligine 250-ge deıin kólik quralyn qabyldaýda», - dep atap ótti vedomstvodan.
Tamyz aıynyń basynda júk kólikteriniń keptelisi óziniń eń joǵary shegine jetti. Osy ýaqyttaǵy kólik aǵyny táýligine 215-ke deıin júk kóligine jetip otyr.
«Osy aralyqta tehnıkalyq sebepterge baılanysty ózbek taraby táýliktiń ótkizý shegin 100 birlikke (oǵan deıin táýligine 130-140 júk kóligin ótkizgen) deıin tómendetti. Atalǵan jaıtqa oraı 7 tamyz kúni bul máseleni sheshý úshin Memlekettik kirister komıteti Ózbekstan Respýblıkasy Memlekettik keden komıtetine hat joldady. Sonymen qatar shekaralas óńirlerdiń keden vedomstvolary basshylarynyń ekijaqty kezdesýleri júrgizildi. Eki keden beketiniń basshylary kún saıyn kólik quraldaryn ótkizýdi jedeldetý máselesi boıynsha kezdesý ótkizýde», - deıdi komıtetten.
Munan bólek, Qazaqstan tarapynyń «B.Qonysbaev» beketin jańǵyrtý jáne keńeıtý boıynsha jobalyq-smetalyq qujatty ázirlep jatqandyǵy aıtylǵan. Joba júzege asqannan keıin bekettiń táýliktik ótkizý qabileti 1 myń kólik quralyna deıin artatyn bolady. Qurylys merzimi - 19 aı.
«Sońǵy aptada ózbek taraty avtokólik quraldaryn ótkizý múmkinshiligin táýligine 150 kólikke deıin jetkizdi. 16 tamyzda olardyń QR tarapyndaǵy shoǵyrlanýy 190 kólikke deıin qysqardy. Taıaý ýaqytta ahýal turaqtalady», - deıdi vedomstvodan.
Kórneki sýret
