Qazaq-Ózbek shekarasynda jabylyp qalǵan jol men ótkizý beketi ashyldy
Qatynas joly men arnaıy bekettiń saltanatty ashylý rásimine Ońtústik Qazaqstan oblysynyń ákimi Janseıit Túımebaev, QR Investıtsııalar jáne damý vıtse-mınıstri Roman Sklıar, Syrdarııa oblysynyń ákimi Gofýrjon Mırzaev pen QR Ózbekstan Respýblıkasyndaǵy Tótenshe jáne Ókiletti elshisi Erik Ótembaev qatysty, dep habarlaıdy QazAqparat HAA tilshisi. 
Óńir basshysy qos memleket jurtshylyǵyn jańa nysannyń paıdalanýǵa berilýimen quttyqtap, Ózbekstan men Qazaqstan Respýblıkalary arasyndaǵy ǵasyrlar boıy qalyptasqan tarıhı qatynastardy jandandyryp, týysqan eki el arasynda máńgilik altyn kópir bolatynyna senim bildirdi.
«2006 jyly jabylǵan osy joldyń qaıta ashylýyna eki el Prezıdentteriniń kelisimi nátıjesinde qol jetkizildi. Jyl basynan beri eki el arasyndaǵy ekonomıkalyq ahýal jandana tústi. Qazaqstan Prezıdenti Nursultan Nazarbaev pen Ózbekstan Prezıdenti Shafkat Mırzeevtiń jańa bastamalarmen tyǵyz baılanysty kúsheıtýi aımaqtardyń damýyna zor serpilis ákeldi. Eki el jetekshileriniń Astana qalasy men Saryaǵashtaǵy kezdesýleri, elordadaǵy Ózbekstan bıznes-forýmy, mamyr aıynda Shymkent qalasynda ótken Tashkent qalasy taýar óndirýshilerinin jármeńkesi sonyń naqty aıǵaǵy»,- dedi Janseıit Túımebaev.
Maqtaaraldyqtardyń Tashkentke qatynas joly - halyqaralyq M-39 avtomobıl joly Qazaqstan Respýblıkasynyń Almaty, Jambyl jáne Ońtústik Qazaqstan oblystary arqyly Ózbekstanǵa ótedi. Joldyń Maqtaaral aýdany arqyly ótetin bóliginiń uzyndyǵy 24,1 shaqyrymdy quraıdy. Atalǵan jol ashylyp, paıdalanýǵa berilgende 350 myń halqy bar Maqtaaral aýdany turǵyndarynyń qatynas joly 80 shaqyrymǵa qysqaryp, jol júrý ýaqytyn únemdeıdi. Sondaı-aq, Ózbekstan turǵyndary úshin Tashkent qalasynan Jızaq arqyly Samarqandqa ótý úshin tótesinen júrýge múmkindik berip, jol 55 shaqyrymǵa qysqardy. Al Syrdarıa» shekara beketi táýligine 5 myń adam men 200 avtokólik ótkizýge múmkindigi bar. 
Qazaqstan eksportynyń Ózbekstandaǵy negizgi baǵyttary munaı jáne munaı ónimderi, un-jarma ónerkásibi ónimderi, dándi-daqyldar, qara jáne tústi metaldar, tsement, transformatorlar, bıorganıkalyq hımııa ónimderi, azyq-túlik taýarlary bolyp tabylady. Óz kezeginde Ózbekstannan Qazaqstanǵa baý-baqsha ónimderi, maqta talshyqtary, tekstıl jáne daıyn tigin ónimderi,tyńaıtqyshtar, mehanıkalyq qurylǵylar, plastmassa, aǵash, gıps jáne matadan daıyndalǵan buıymdar ımporttalady.
Aıta keteıik, Ońtústik Qazaqstan oblysy Qazaqstandaǵy halyq eń tyǵyz qonystanǵan aımaq atanýymen erekshelenedi. 2016 jyldyń qorytyndysy boıynsha Ózbekstanmen aradaǵy syrtqy saýda aınalymy 1,5 mlrd AQSh dollaryn quraǵan bolsa, onyń 30% (532,4 mln AQSh dollar) astamy Ońtústik Qazaqstan oblysynyń enshisinde.
