Qazaq-ózbek shekarasyn zańsyz buzyp ótpek bolǵandar ustaldy
ASTANA. QazAqparat - Qazaq-ózbek shekarasynda qarýly shabýyl oryn aldy: shekarany buzǵan eki adamnyń biri kelisimshart qyzmetiniń qatardaǵy jaýyngerine pyshaq ala júgirip, qarýly qarsylyq tanytty. Bul týraly QR UQK ShQ-niń baspasóz qyzmetinen habarlaıdy.
«Qaqpaq» zastavasynyń kelisimshart qyzmetiniń qatardaǵy jaýyngerler jasaǵy Ý.Jumahov pen N.Ábdirashev memlekettik shekaranyń qazaq-ózbek ýchaskesin kúzetip turǵan edi.
Aınalany qarap júrgen shekarashylar irgeles aýmaqta júrgen belgisiz eki adamdy kórip, olardy baqylaýǵa alǵan. Bul adamdardyń shekaradan zańsyz ótý úshin qolaıly oryn izdep júrgenderi túsinikti boldy.
Qolaıly sátti tańdaǵan qaskúnemder shekaraǵa qaraı júrdi. Jasaq radıostansadan bolyp jatqan jaǵdaı týraly birden zastavaǵa habarlaǵan. Birneshe mınýttyń ishinde bólimshe komanda boıynsha kóterilgen. «Dabyl tobyn» zastavanyń bastyǵy, kapıtan T.Jaqypov basqardy.
Ózderine jaqyndap kele jatqan shekaralyq «ÝAZ» kóligin kórgen shekara buzýshylar qasha jóneledi. Shekarashylar bireýin birden ustady. Ózimen birge pyshaǵy bolǵan ekinshisi qarsylyq tanytty. Qol jekpe-jegi ádisterin qoldanǵan aǵa serjant N.Aıdarov ony qarýsyzdandyrdy.
Ustalǵan Qazaqstannyń 30 jastaǵy azamaty men Ózbekstannyń 35 jastaǵy azamaty aǵaıyndylar bolyp shyqty. Tekserý barysynda ustalǵandar Ózbekstanda qarýdy urlaý jáne zańsyz saqtaǵany úshin sottalǵandary anyqtalǵan.
Olarǵa qatysty «Qazaqstan Respýblıkasynyń Memlekettik shekarasyn zańsyz qasaqana buzý» jáne «Qyzmetin atqarǵan bılik ókiline qarsylyq tanytý» baptary boıynsha qylmystyq is qozǵaldy.
Jasaq quramy qyzmetin qyraǵylyqpen júrgizgeni úshin marapatqa usynyldy.
