Qazaq-ózbek shekarasyndaǵy keden beketterin jóndeý qashan aıaqtalady
TAShKENT. KAZINFORM – Ózbekstanmen shekaradaǵy «Qaplanbek» keden beketi bıyl tamyzda qaıta ashylady. Bul týraly ótkizý pýnktterin jańǵyrtý máseleleri boıynsha Qazaqstan men Ózbekstannyń jaýapty organ ókilderinen jasaqtalǵan arnaıy jumys tobynyń kezdesýinde málim boldy, dep habarlaıdy Kazinform agenttiginiń Tashkenttegi menshikti tilshisi.
Taraptardyń kezekti kezdesýi aıasynda jumys tobynyń músheleri «Jibek-Joly» - «Gıshtkýprık» pen «Qaplanbek» - «Navoı» keden beketterinde júrip jatqan jóndeý jumystarymen tanysty. Ózbekstan Memlekettik keden komıteti strategııalyq josparlaý jáne kedendik rásimderdi ońtaılandyrý basqarmasynyń basshysy Farhod Allamjonovtyń aıtýynsha, rekonstrýktsııalaý jobalary qos tarappen birge kelise otyryp atqarylyp jatyr.
«Eki el prezıdentteriniń tapsyrmasymen «Jibek-Joly» - «Gıshtkýprık», «Qaplanbek» - «Navoı» sııaqty eń iri ótkizý pýnktilerin jóndeý sheshimi qabyldandy, oǵan saı arnaıy jumys toby quryldy. Ol top úsh aıda bir ret kezdesý ótkizip, rekonstrýktsııalyq jobalardyń barysymen tanysady. Qazir jóndeý júrip jatqan qazaqstandyq «Qaplanbek» pen onyń ózbek tarapyndaǵy «Navoı» ótkizý pýnktileri bıyl ashylady dep josparlanǵan. Ózbekstan – maýsym, al Qazaqstan tamyz aıynda aıaqtaýy tıis. Bul pýnktiler iske qosylsa, onda osy jerden ótetin júk tasymalynyń kólemi 3 esege artady», - dep málim etti Farhod Allamjonov.
Aıta keteıik, «Qaplanbek» ótkizý pýnktisi negizinen júk tasymalyna arnalǵanymen, bul jer jeke tulǵalardy da qabyldaıdy. Munymen qatar, Ózbekstan tarapy qazaqstandyq «Jibek-Joly» beketimen ushtasyp jatqan «Gıshtkýprık» ótkizý pýnktisine júrgizilip jatqan jóndeý jumystaryn bıyl aıaqtaýdy kózdep otyr.
«Gıshtkýprık» ótkizý pýnktin rekonstrýktsııalaý byltyr jazda bastalǵan. Ony bıyl tamyz aıynda aıaqtaý josparlanyp otyr. Bul keden beketi táýligine 30 myńǵa jýyq jolaýshy men 1 myń jeńil kólikti ótkizýge qaýqarly. Jóndeý jumystarynyń nátıjesinde ol táýligine 50 myń adamdy jáne 3 myńǵa jýyq avtokólikti qabyldaıtyn bolady», - dep toqtaldy Farhod Allamjonov.
Jóndeý aıaqtalǵan soń «Gıshtkýprık» bir ýaqytta 12 jeńil kólik pen 9 avtobýsty tekseristen ótkize alady. Al onyń qazaqstandaǵy bóligi, ıaǵnı «Jibek-Joly» beketin rekonstrýktsııalaý 2025 jylǵa josparlanǵan.
«2023 jyly «Jibek-Joly» pýnktinen shamamen 9 mln jolaýshy ótken. Bul – jeke tulǵalardyń basym kópshiligi júretin beket sanalady. Josparǵa sáıkes, oǵan 2025 jyly jóndeý jasalady. Bizdiń jobalaýymyzsha, rekonstrýktsııalaý jumystarynan keıin onyń ótkizý qabileti táýligine 35 myń jolaýshyǵa deıin ulǵaıady. Jaz kezderinde, atap aıtqanda shilde-tamyz aılary aralyǵynda bul pýnkti táýligine 50 myńǵa jýyq azamatty qabyldap júr», - dedi QR Qarjy mınıstrligi Memlekettik kirister komıteti tóraǵasynyń orynbasary Baqytjan Slıamov.
Onyń atap ótýinshe, Qazaqstan tarapy «Qazyǵurt», «Atameken», «Qaplanbek» sııaqty keden beketterine jóndeý jumystaryn júrgizip jatyr. Onyń úsheýi de bıyl qaıta paıdalanýǵa beriledi.
