Qazaq-ózbek shekarasyndaǵy 40 shaqyrymdyq kezek: júk kólikteri nege keptelip qaldy
TÚRKІSTAN. KAZINFORM – Túrkistan oblysyndaǵy «Baýyrjan Qonysbaev» keden beketiniń mańynda júk kólikteriniń 40 shaqyrymǵa jýyq kezegi týraly vıdeo áleýmettik jelilerde tarady.
Beınejazbada Qazaqstan men Ózbekstan shekarasyndaǵy «Baýyrjan Qonysbaev» ótkizý beketinde 40 shaqyrymǵa sozylǵan júk kólikteriniń uzynsonar kezegi baıqalady.
Osyǵan baılanysty Túrkistan oblysy boıynsha memlekettik kirister departamenti túsinikteme berdi.
Kedendik ákimshilendirý basqarmasynyń basshysy Serik Malıkovtyń aıtýynsha, jyl basynan beri shekaradaǵy júk kólikteriniń aǵyny turaqty túrde ósip keledi. Qańtardan shildege deıin júk kólikteriniń sany 51 paıyzǵa artqan.
– Bıyl qańtar aıynda qazaq-ózbek shekarasynda ótkizý pýnktteri arqyly 25 004 júk kóligi, aqpanda – 22 843, naýryzda – 26 121, sáýirde – 28 533, sondaı-aq mamyrda – 30 144, maýsymda – 34 735, shildede – 37 718 júk kóligi ótti, – dedi Serik Malıkov.
Onyń málimetinshe, Túrkistan oblysynyń aýmaǵynda júk kólikterin ótkizetin úsh ótkizý pýnkti bar. Qazirgi ýaqytta «Baýyrjan Qonysbaev» beketi eksport baǵytynda táýligine orta eseppen 600-650 júk kóligin ótkizedi.
– Bekettiń ınfraqurylymdyq ótkizý qabileti táýligine 500 kólikke deıin eseptelgen. Soǵan qaramastan ótkizý qarqyny keı kúnderi táýligine 700 júk kóligine deıin jetedi. Kezekte turǵan kólikterdiń barlyǵy ádette bir táýlik ishinde ótkiziledi, – dedi ol.
Sondaı-aq Serik Malıkov Qytaı shekarasyndaǵy jaǵdaımen salystyrǵanda mundaǵy kezektiń uzaqtyǵy aıtarlyqtaı az ekenin atap ótti. Onyń aıtýynsha, Qytaı shekarasynda júk kólikteri keıde bir aıǵa deıin kezekte turady. Tipti aldaǵy 15 qyrkúıekke aldyn ala kezekke jazylǵan júrgizýshiler bar. Bul rette Qytaımen shekaradaǵy ótkizý pýnktteriniń mańynda júk kólikterine arnalǵan turaq oryndary qarastyrylǵan.
Onyń sózinshe, avtoturaq máselesi óńirdegi keıbir ótkizý pýnktterinde ózekti bolyp otyr. Saldarynan júrgizýshiler kólikterin jol jıegine qoıýǵa májbúr. Osy máseleni sheshý maqsatynda «Baýyrjan Qonysbaev» ótkizý pýnktiniń mańynda avtoturaq salý qolǵa alynǵan.
Keles aýdany ákimdiginiń málimetinshe, aýdan aýmaǵy arqyly táýligine 30 myń tranzıttik kólik ótedi. Qazir «Baýyrjan Qonysbaev» keden beketiniń mańynda kólik-logıstıka salasyn damytýǵa baǵyttalǵan «Global Food Logistics» JShS-niń ınvestıtsııalyq jobasy júzege asyp jatyr.
– Joba avtoturaq máselesin tolyq sheshpegenimen, júk kólikteri úshin turaq oryndaryn kóbeıtýge jáne kólik qozǵalysyn retteýge múmkindik beredi. Jeke ınvestıtsııa esebinen iske asyrylatyn nysannyń quny – 3,7 mlrd teńge. Jalpy aýmaǵy – 10 gektar. Logıstıkalyq keshen 1000 júk kóligine arnalǵan. Qurylys jumystaryn bıyl bastap, jyl sońyna deıin aıaqtaý josparlanyp otyr. Nysan iske qosylǵannan keıin 30 jańa jumys orny ashylady, – delingen aýdan ákimdiginiń Kazinform agenttigine bergen jaýabynda.
Buǵan deıin Túrkistan oblysyndaǵy «Qaplanbek» ótkizý beketinde janjal týyp, polıtsııa is qozǵaǵanyn jazǵan edik.
