Qazaq-ózbek shekarasynda júk kólikteri táýliktep turýǵa májbúr

TÚRKІSTAN. KAZINFORM — Áleýmettik jelilerde Túrkistan oblysyna qarasty qazaq-ózbek shekarasyndaǵy «B.Qonysbaev» keden beketinde birneshe shaqyrymǵa sozylǵan júk kólikteriniń eki táýlikten asa kepteliste turǵany boıynsha beınejazba tarady.

Onda keden beketinde turǵan júk kóliginiń júrgizýshileri shekara beketinen ótý úshin 5-6 shaqyrymǵa sozylǵan kepteliste 2-3 kúnnen asa kútetinin aıtyp, shaǵymdaryn bildirgen.

Bul máselege qatysty Túrkistan oblysy boıynsha Memlekettik kirister departamenti Kedendik ákimshilendirý basqarmasynyń basshysy Serik Malıkov pikir bildirip, júk kólikteri ıeleriniń shaǵymyn joqqa shyǵardy.

— Júrgizýshilerdiń birneshe kúndep kezek kútemiz degen pikirleri qısynsyz. Máselen, júk kólikteri keden beketinde 100-shi bolyp kezekke tursa, 6-7 saǵatta ótip ketedi. Jóndeýden keıin qaıta ashylǵan Qazaqstan-Ózbekstan shekarasyndaǵy «B.Qonysbaev» pýnktiniń burynǵyǵa qaraǵanda áldeqaıda áleýeti artty. Buryn táýligine 70 kólik ótkizilse, qazir 500 kólikti ótkizýge qaýqarly. Qys mezgilinde júk kólikteri budan da kóbeıetin kezder bolady. Júrgizýshiler shydamsyzdyq tanytady. Júk kólikteriniń qozǵalysy ótkizý qabilettiliginiń shekteýli bolýymen tikeleı baılanysty. Osyny júrgizýshiler túsinýi kerek, — dedi departament ókili.

Aıta ketý kerek, oblystaǵy «Qaplanbek» ótkizý pýnkti júk kólikterin ótkizýge arnalǵan, alaıda «Jibek Joly» ótkizý pýnktiniń jabylýyna baılanysty bul fýnktsııany ýaqytsha júzege asyrmaıdy. Atalǵan keden beketi kelesi jyly tolyq ashylmaq.

Budan buryn Ózbekstan tarapymen «Gısht-Kýprık» ótkizý pýnktiniń qurylysyn aıaqtaý úshin birneshe aıǵa jabylýyna baılanysty, Qazaqstan tarapyndaǵy «Jibek Joly» ótkizý pýnkti de jabylatyny týraly jazǵan edik.

Sondaı-aq elimizdiń keden beketterindegi kameralar Astanadaǵy monıtorıng ortalyǵyna tikeleı qosylatyny týraly habarladyq.