Qazaq-ózbek shekarasynda tranzıttik júk ótetin pýnktter sany artýy múmkin
ASTANA. KAZINFORM – Qazaqstan men Ózbekstan jalpy quny 1 mlrd dollardy quraıtyn jańa 21 jobany iske qosý máselesin pysyqtap jatyr. Bul týraly elordada Ózbekstan Syrtqy ister mınıstri Bahtıer Saıdovpen keńeıtilgen quramdaǵy kelissózderden keıingi brıfıngte Premer-Mınıstrdiń orynbasary – Syrtqy ister mınıstri Murat Nurtileý aıtty.
«Jańa ǵana Bahtıer Saıdov myrzamen shaǵyn jáne keńeıtilgen quramda dástúrli dostyq, ózara qoldaý men senim rýhyndaǵy kelissózder ótkizdik. Biz yqpaldastyǵymyzdyń tyń baǵyttaryn aıqyndap, irgeli mindetterdi alǵa qoıyp otyrmyz. Bıylǵy jyly ótetin joǵary deńgeıdegi saparlarǵa, memleket basshylarynyń kópjaqty formattaǵy kezdesýlerine erekshe nazar aýdaryldy. Ekonomıkalyq yntymaqtastyqty odan ári tereńdetý perspektıvalaryn ortaǵa saldyq. Osy tusta, saýda, ónerkásip, kólik jáne logıstıka salalaryndaǵy ózara is-qımyl máseleleri jete talqylandy», - dedi mınıstr.
Onyń dereginshe, Qazaqstan Ózbekstannyń «úshtikke» kiretin eń iri saýda seriktesteriniń biri. Sońǵy jyldary ekijaqty saýda kólemi turaqty túrde 4 mlrd dollardan asady.
«Ónerkásiptik kooperatsııa salasynda aıtarlyqtaı jetistikterge qol jetkizildi. Qazirgi tańda jaly quny 156 mln dollardy quraıtyn 12 birlesken joba iske qosyldy. Oǵan qosa, quny 1 mlrd dollardy quraıtyn jańa 21 jobany qarastyryp jatyrmyz. Endi aldaǵy belesterdiń biri – osy alǵan ekpindi joǵaltpaı, ekijaqty taýar aınalymyn 10 mlrd dollarǵa deıin eseletý. Qazaq-ózbek shekarasynda Halyqaralyq ónerkásiptik kooperatsııa ortalyǵyn qosy osy maqsatqa baǵyttalǵan. Óńiraralyq yntymaqtastyq forýmdaryn ótkizýdiń mańyzdylyǵyn da bólek atap óttik», - dedi Murat Nurtileý.
Mınıstrdiń aıtýynsha, Ortalyq Azııa aımaǵy turǵyndarynyń kókeıinde júrgen mańyzdy másele – sý-energetıkalyq kesheni tóńireginde de pikir almasyp, ony sheshý joldaryna nazar aýdaryldy.
«Sonymen qatar, basqa da birlesken jobalardy júzege asyrý barysyn talqyladyq. Atalǵan bastamalarǵa syrtqy saıası vedomstvolary tarapynan qajetti qoldaý tabylady dep ýaǵdalastyq. Eki memlekettiń tranzıttik áleýetin arttyratyn jańa temir joldardy salý jobalary erekshe nazarda. Óz kezeginde, shekara arqyly ózbek tasymaldaýshylary úshin tranzıtti jeńildetý baǵytynda naqty qadamdar jasaý týraly ýaǵdalastyqqa qol jetkizdik. Qazaq tarapy bul máselelerde ortaq múdde turǵysynan qarap, ózimizdiń múddemizge sáıkes sheshýge daıyn ekendigimizdi atap óttim. Óz kezeginde shekara arqyly ózbek tasymaldaýshylary úshin tranzıtti jeńildetý baǵytynda birneshe usynysyn berdi. Onyń ishinde shekaradan ótý pýnktteriniń sanyn kóbeıtý, jańa jol salý máseleler sııaqty kóptegen naqty suraqtardy talqylap, jaqyn arada tıisti mınıstrlikter arasynda kelissózder júrgizý týraly ýaǵdalastyqqa qol jetkizdik», - dedi Murat Nurtileý.
