Qazaq-ózbek shekarasynda ornalasatyn ónerkásiptik keshenniń qurylysy bıyl bastalady
TAShKENT. KAZINFORM – Bıyl tamyzda Qazaqstan men Ózbekstan shekarasynda ornalasatyn «Ortalyq Azııa» ónerkásiptik kooperatsııa kesheniniń qurylysy bastalady. Bul týraly Ózbekstanǵa jumys saparymen kelip, atalǵan jobanyń jaı-kúıin talqylaǵan QR Saýda jáne ıntegratsııa vıtse-mınıstri Qaırat Tórebaev aıtty, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Qazaqstannyń Túrkistan jáne Ózbekstannyń Syrdarııa oblystarynda salynatyn ónerkásiptik keshen 100 gektarǵa jýyq aýmaqty qamtıdy. Bizdiń el tarapynan 50 gektar jer bólinip, keshendi salatyn ınvestor tabylǵan. Joba boıynsha, onda jabyq keshen qurylyp, óndiris jáne kóterme saýdaǵa laıyqty jaǵdaı jasalmaq.
«Bizdiń jaqtan negizgi ınvestor anyqtaldy. Ol ındýstrıaldy aımaqty memlekettik jáne jekemenshik kapıtaldy biriktirý arqyly salady. Qazaqstan jaqtan 50 gektar bólindi. Ony 100 gektarǵa deıin ulǵaıtý josparlanyp otyr. Osy tamyz aıynda kooperatsııa salyna bastaıdy. Jumys tobynyń otyrysy kezinde Ózbekstannyń maqta óńdeý kompanııasymen kelisimge qol qoıyldy. Ol kásiporynǵa salynatyn keshenniń ishinen 15 gektar aýmaq beriledi. Sol jerde kompanııa óziniń óndirisin jolǵa qoıady», - dedi Qaırat Tórebaev Kazinform tilshisiniń saýalyna jaýap bere otyryp.
Ónerkásiptik keshenniń Qazaqstandaǵy bóligine ındýstrıaldy aımaq mártebesi beriledi. Tıisinshe, onyń aıasnda kásipkerlerge jeńildikter usynylady. Keıin onda óndirilgen ónim eki eldiń naryǵymen qatar, úshinshi memleketterge de eksporttalady. Nátıjesinde Qazaqstan men Ózbekstan arasyndaǵy ózara saýda aınalymyn 10 mlrd dollarǵa jetkizý kózdelgen.
«Qurylysty 2027 jylǵa qaraı aıaqtaımyz. Qazir eki jaqta ornalasatyn, kásip bastaıtyn ınvestorlarmen kelissózder júrip jatyr. Jergilikti ǵana emes, sonymen qatar sheteldik bıznes ókilderi de osynda óndiris ashýǵa nıetti. Oǵan deıin qajetti ınfraqurylymdy jasaqtaımyz», - dedi Syrdarııa oblysy ınvestıtsııa jáne saýda basqarmasy basshysynyń orynbasary Bekmýrod Akbarov.
Keshenniń tolyq iske qosylyp, saýda-sattyǵy jolǵa qoıylatyn kezeń retinde 2030 jyl belgilenip otyr. «Ortalyq Azııa» ónerkásiptik kooperatsııasy Túrkistan jáne Syrdarııa oblystarynyń ishki jalpy ónimin arttyryp qana qoımaı, shekaralyq aımaqtardy iri logıstıkalyq habqa aınaldyrýǵa yqpal etpek. Eki jaqtan da osy ispen aınalysatyn quzyrly organdar aıqyndalǵan.
Taraptar kezdesý sońynda birlesken qujatqa qol qoıyp, ózderine tıesili aýmaqta qadaǵalaýdy kúsheıtýge ýaǵdalasty.
