Qazaq-ózbek shekarasynan ótetin júk kólikteri úshin elektrondyq kezek júıesi engiziledi
TAShKENT. KAZINFORM – Maýsym aıynan bastap Qazaqstan men Ózbekstan shekarasynda júk kólikteri úshin elektrondyq kezek júıesi engizile bastaıdy, dep habarlaıdy Kazinform agenttiginiń menshikti tilshisi.
Atalǵan bastama Almatyda QR Memlekettik kirister komıtetiniń tóraǵasy Jandos Dúısembıev pen ÓR Memlekettik keden komıtetiniń basshysy Akmalhýja Mavlonov arasynda ótken kezdesýde talqylandy. Alǵashqy ýaqytta elektrondyq kezek júıesi «Qaplanbek» (QR) - «Navoı» (ÓR) keden beketinde iske qosylady.
Ózbekstan Keden komıtetiniń málimetinshe, bul - 2030 jylǵa qaraı eki memleket arasyndaǵy ózara taýar aınalymyn 10 mlrd dollarǵa jetkizýge múmkindik beredi.
Sondaı-aq, taraptar «B.Qonysbaev» - «ıAllama», «Qazyǵurt» - «S.Nadjımov» jáne «Syrdarııa» - «Malık» beketterindegi júktemeni azaıtý úshin bos jáne iri júk kólikterin ózge pýnktter arqyly ótkizý múmkindigin qarastyrdy.
Munymen birge kezdesýde jaýapty vedomstvo basshylary Astanada Ózbekstannyń, Tashkentte Qazaqstan keden organynyń ókildigin ashýǵa ýaǵdalasty.
Eske salaıyq, qańtar-sáýir aılary aralyǵynda Qazaqstan men Ózbekstan arasyndaǵy ózara taýar aınalymy 1,4 mlrd dollarǵa jýyqtady.
Buǵan deıin habarlaǵanymyzdaı, Qazaqstan men Ózbekstan saýda-sattyq kólemin arttyrý úshin qosymsha 4 saýda dálizin ashýdy josparlap otyr.