Qazaq-ózbek myńjyldar boıy qalyptasqan asa baı muraǵa ıe — Ózbekstan Senatynyń tóraǵasy
ASTANA. KAZINFORM — Elordada resmı saparmen júrgen Ózbekstan Olıı Májilisi Senatynyń tóraǵasy Tanzıla Narbaeva qazaq-ózbek dostyǵynyń negizin tarqatyp berdi.
— Qazaq-ózbek arasyndaǵy baılanys ǵasyrlar boıy nyǵaıyp keledi. Qurmetti Qazaqstan Respýblıkasynyń prezıdenti Qasym-Jomart Toqaev pen Ózbekstan Respýblıkasynyń Prezıdenti Shavkat Mırzıeev el basshylyǵyna kelgen kezde qarym-qatynas jańa serpin aldy. Bul olardyń tarapynan jasalǵan saıası erik-jigerdiń belgisi. Prezıdentter halyqty jaqyndastyrý úshin birlesip kúsh salyp keledi. Ekonomıka — adamdardyń ómirin jeńildetip, ál-aýqatyn arttyratyn qýatty draıver ekeni sózsiz. Biraq, shabytsyz, ǵylymı izdenissiz, jańashyl rýhsyz reformalardy tolyq júzege asyrý múmkin emes. Sondyqtan bizdiń prezıdentterimizdiń atalǵan salalardy qoldaýy — óte durys sheshim dep sanaımyn, — dedi Tanzıla Narbaeva elordada ótken qazaq-ózbek zııaly qaýymynyń alǵashqy forýmynda.
Ózbek Senaty spıkeriniń málimdeýinshe, qazaq pen ózbek halqy tamyry ortaq, taǵdyry bir, myńjyldar boıy qalyptasqan asa baı muraǵa ıe. Eki el órkenıetter toǵysynda, Uly Jibek jolynyń qaq júreginde ornalasqan.
— Mádenıet pen ǵylym jalpy yntymaqtastyqtyń damýy men nyǵaıýyna tikeleı baılanysty ekeniniń taǵy bir mysaly. Qurmetti dostar, búgingi forým gýmanıtarlyq ózara is-qımylda jańa jetistikterge jol ashatyn mańyzdy kezeń bolaryna senimdimin. Bul jerde ǵalymdar, mádenıet pen óner qaıratkerleri eki halyqtyń dostyǵy men ózara túsinistigine qyzmet etetin ıdeıalardy dúnıege ákeledi. Búkil delegatsııa atynan barshańyzǵa jemisti pikirtalas, jarqyn jańalyqtar men birlesken jobalardyń kóp bolýyn tileımin. Búgingi oqıǵa yntymaqtastyǵymyzdyń odan da tyǵyz ári jemisti bolýyna bastaý bolsyn. Sondaı-aq óz tarapymnan aıta ketsem, alda Ózbekstannyń Táýelsizdik kúni kele jatyr, al sizderde Konstıtýtsııa kúni, ata zań merekesi jaqyndap qaldy, barshany aıtýly meırammen shyn júrekten quttyqtaımyn, — deıdi ol.
Búgin Astanada qazaq-ózbek zııaly qaýymynyń alǵashqy forýmy ótti. Alǵash uıymdastyrylǵan forýmǵa Senat tóraǵasy Máýlen Áshimbaev jáne Ózbekstan Olıı Májilisi Senatynyń tóraǵasy Tanzıla Narbaeva bastaǵan qazaq-ózbek ǵylymı-shyǵarmashylyq zııaly ókilderi qatysty.
Buǵan deıin Senat tóraǵasy Máýlen Áshimbaev Qazaqstan men Ózbekstan qarym-qatynasy buryn-sońdy bolmaǵan bıik deńgeıge kóterilgenin basa aıtqan edi.
Aıta keteıik, keshe Prezıdent Qasym-Jomart Toqaev Ózbekstan Olıı Májilisi Senatynyń tóraǵasy Tanzıla Narbaevany qabyldady.