Qazaq-ózbek qatynasyn nyǵaıtýǵa múmkindik ashady – ózbekstandyq sarapshylar Joldaý jaıly
TAShKENT. KAZINFORM – Joldaýda qamtylǵan basym baǵyttar memlekettiń damýyna serpin berip, qazaq-ózbek qatynastaryn odan ári nyǵaıtýǵa jańa múmkindik ashady. Eldiń áleýmettik-ekonomıkalyq ilgerileý baǵytyn aıqyndaıtyn mańyzdy qujatqa taldaý jasaǵan ózbekstandyq sarapshylardyń pikiri osyǵan saıady, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Qazaqstannyń Ózbekstandaǵy elshiligi uıymdastyrǵan dóńgelek ústelge jergilikti sarapshylar men BAQ ókilderi jınaldy. Olar Joldaýda Memleket basshysy Qasym-Jomart Toqaevtyń ár baǵyt boıynsha kótergen usynystaryna toqtalyp, mańyzdy qujattyń el ekonomıkasyn ilgeriletý men halyqaralyq baılanystardy nyǵaıtýǵa serpin beretinin atap ótti.
«Joldaýda aıtylǵan kadrlyq áleýetti arttyrý jónindegi tapsyrma mańyzdy máseleniń biri. Ol keıbir saladaǵy maman tapshylyǵyn sheshýge baǵyttalǵan. Buǵan qosa, sheteldik 20 oqý ornynyń fılıalyn ashý bastamasyn joǵary baǵalaımyn. Bul rette bizdiń memleketter uqsas ustanymda. ıAǵnı, eki elde de bilim salasy jan-jaqty damyp, bolashaq mamandyqtaryn meńgerýge nazar aýdarylyp keledi», - dedi ÓR Jýrnalıstıka jáne buqaralyq kommýnıkatsııa ýnıversıtetiniń rektory Sherzodhon Kýdrathýja.
Sonymen qatar, dóńgelek ústelge qatysqan belgili ózbekstandyq sarapshy Ravshan Nazarovtyń pikirinshe, Qazaqstandaǵy aýqymdy reformalar qoǵam ómirine eleýli ózgeris engizip, nátıje bere bastady.
«Qazaqstandaǵy túbegeıli ári nátıjeli ózgeristerdi ańǵarmaý múmkin emes. Elde «halyq únine qulaq asatyn memleket» tujyrymdamasy júıeli jolǵa qoıylyp, jergilikti ákimderdi tikeleı saılaý isi sátti júrgizilip keledi. Bul oraıda bılik pen halyq arasyndaǵy baılanysty bekemdeı túsý úshin memlekettik basqarý júıesin jetildirý tıimdilikti arttyra tústi», - dep toqtaldy ÓR Ǵylym Akademııasy Memleket jáne quqyq ınstıtýtynyń aǵa ǵylymı qyzmetkeri Ravshan Nazarov.
Joldaýdy talqylaı otyryp, sarapshylar qujatta qamtylǵan basym baǵyttar qazaq-ózbek qatynastaryn odan ári nyǵaıtýǵa jańa múmkindik ashatynyn atap ótti. Jalpy buǵan deıin qalyptasqan memleket jáne úkimet basshylary deńgeıindegi tyǵyz baılanys qos halyq arasyn jaqyndatyp, yntymaqtastyqty tereńdetýge oń yqpal etip keledi.
