Qazaq-ózbek yntymaqtastyǵy yqtımal qaterlerdi birlese eńserýge qaýqarly – sarapshy
TAShKENT. KAZINFORM – Resmı Astana men Tashkent jeke-dara áreket etýge qaraǵanda, birlesý - jetistikke jol bastaıtynyn jaqsy túsinedi. Mundaı pikirdi Prezıdent Qasym-Jomart Toqaevtyń Ózbekstanǵa memlekettik sapary qarsańynda Kazinform tilshisine suhbat bergen beldi saıasattanýshy Ravshan Nazarov bildirdi.
Sóz basynda sarapshy atap ótkendeı, keıingi jyldary Qazaqstan men Ózbekstan joǵary deńgeıdegi dıalogty damytýǵa aıryqsha kóńil bólip keledi.
- Mundaı belsendilikke elderdiń Ortalyq Azııa aımaǵynyń bolashaǵyna qatysty ortaq ustanymy men ózara senimge negizdelgen yntymaqtastyǵy ózek bolyp otyr. Qazaqstan men Ózbekstan jeke-dara áreket etýge qaraǵanda, birlesý - jetistikke jol bastaıtynyn jaqsy túsinedi. Bul óz kezeginde ekonomıkalyq ilgerileý, halyqtyń ómir súrý deńgeıin arttyrý jáne aımaqtyq qaýipsizdikti qamtamasyz etý máselelerin jedel ári sapaly sheshýge múmkindik beredi, - dep toqtaldy Ravshan Nazarov.
Saıasattanýshynyń pikirinshe, eki el arasyndaǵy ıntegratsııa protsesin údetý jolynda ortaq tarıh pen ejelden qalyptasqan mádenı-gýmanıtarlyq baılanystar da erekshe ról atqarady.
- Álemdegi geosaıası jaǵdaı elderdi birlese áreket etýge, senimdi seriktesterdi izdeýge ıtermelep jatyr. Tıisinshe, bul Qazaqstan men Ózbekstan seriktestiginiń asa ózekti bola túskenin aıǵaqtaıdy. Eki el arasyndaǵy pragmatızm men ózara qurmetke negizdelgen yntymaqtastyq kez-kelgen yqtımal qaýip-qaterdi birlese eńserýge qaýqarly, sondaı-aq alǵa jyljýǵa sep bolatyn qozǵaýshy kúsh sanalady, - dep pikir qosty sarapshy.
Ravshan Nazarov atap ótkendeı, qos memlekettiń túrli salalardy damytýǵa qatysty bastamalary men múddeleri bir-birimen ushtasyp jatyr. Atap aıtqanda, Qazaqstan men Ózbekstannyń energetıka jáne kólik-logıstıka sektorlaryndaǵy áleýeti mol. Sáıkesinshe, elder osy múmkindikti paıdalana otyryp, úkimettik deńgeıde tyǵyz áreket etýge den qoıyp jatyr.
- Eki taraptyń da tranzıttik dálizder men logıstıka salasyndaǵy áleýeti zor. Degenmen ol tolyq paıdalanylyp jatqan joq. Bizdiń elderimizdiń aýmaǵy arqyly ótetin Eýropa men Azııany baılanystyratyn basty joldardy damytý ekonomıkalyq ósimniń ózegi bola alady. Qoldanystaǵy ınfraqurylymdy jańǵyrtý, jańa logıstıkalyq hab qurý jáne júk tasymaly protsesin ońtaılandyrý úshin tsıfrlyq tehnologııalardy engizýge erekshe nazar aýdarý qajet, - dep málim etti Ravshan Nazarov Kazinform tilshisiniń saýalyna jaýap bere otyryp.
Onyń sózinshe, kólik dálizderin birlesip damytý tranzıttik áleýetti arttyryp, logıstıka shyǵyndaryn qysqartýǵa múmkindik beredi.
- Júkterdi baqylaýǵa arnalǵan biryńǵaı tsıfrlyq platforma qurý, kedendik rásimderdi ońtaılandyrý jáne standarttardy úılestirý - bizdiń tranzıttik dálizderdiń básekege qabilettiligin arttyrady, - dep túıindedi Ravshan Nazarov.
Eske salaıyq, bıylǵy 9 aıdyń qorytyndysy boıynsha Qazaqstan Ózbekstannyń negizgi saýda seriktesteriniń úshtiginde qaldy. Qamtylyp otyrǵan kezeńde resmı Tashkent Astanaǵa 1 mlrd dollardyń taýaryn eksporttap, 2,4 mlrd dollardan astam somaǵa ónim ımporttaǵan.
Buǵan deıin habarlaǵanymyzdaı, Ózbekstanda qazaqstandyq kapıtalmen jumys isteıtin kompanııalar qatary kóbeıdi. Atap aıtqanda, jarty jyldyń ishinde bizdiń el Ózbekstanda 116 kásiporyn ashty. Osylaısha, qazir resmı Tashkentte qazaqstandyq kapıtalmen jumys isteıtin kompanııalar sany 1 157-ge teńeldi.
Sondaı-aq, taıaýda ótken Qazaqstan men Ózbekstannyń bıznes-forýmy barysynda qos eldiń kásipkerleri quny 71 mln dollar bolatyn kelisimshartqa qol qoıdy.