Qazaq-ózbek baılanysy barlyq salada jańa bıikke kóterilýde – Máýlen Áshimbaev
TAShKENT. QazAqparat – QR Parlamenti Senatynyń Tóraǵasy Máýlen Áshimbaevtiń Ózbekstanǵa sapary barysynda eki eldiń parlamentaralyq yntymaqtastyǵyn damytýdyń 2021-2022 jyldarǵa arnalǵan jol kartasyna qol qoıyldy. Bul týraly M.Áshimbaev Facebook-te jazdy.
«Shet eldermen parlamentaralyq yntymaqtastyqty nyǵaıtý – Senat jumysyndaǵy negizgi basymdyqtardyń biri. Bul baǵyt Memleket basshysynyń da únemi nazarynda ekeni belgili. Osyǵan oraı búgin resmı saparmen Ózbekstan Respýblıkasyna keldim.
Qazaq pen ózbek tamyry bir, tarıhy ortaq, týysqan halyqtar. Sondaı-aq, Ózbekstan búginde Qazaqstannyń tek Ortalyq Azııadaǵy emes, álemdik qaýymdastyqtaǵy senimdi strategııalyq seriktesi jáne odaqtasy. Dostyq pen baýyrlastyqqa negizdelgen mundaı tyǵyz qarym-qatynastyń qalyptasýyna Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev zor eńbek sińirgeni belgili», - deıdi Senat spıkeri.
M.Áshimbaevtyń aıtýynsha, qazirgi tańda qos memlekettiń basshylary Qasym-Jomart Toqaev pen Shavkat Mırzıeev osy sabaqtastyqty saqtaýǵa basa mán berip otyr.
«Sonyń nátıjesinde qazaq-ózbek baılanysy barlyq salada jańa bıikke kóterilýde. Atalǵan yntymaqtastyqty odan ári órkendetýge Parlamentterimiz de óz úlesterin qosyp keledi.
Sapardyń alǵashqy kúninde Ózbekstannyń Olıı Májilis Senatynyń Tóraǵasy Tanzıla Narbaevamen kezdestim. Kezdesý barysynda ekijaqty qarym-qatynasty kúsheıtýde Parlamentterimizdiń, onyń ishinde Joǵarǵy palatalardyń atqaratyn róline toqtaldyq. Saýda-ekonomıkalyq jáne mádenı-gýmanıtarlyq baılanystardy damytýdyń mańyzdy tetikterin sóz ettik. Bul salalarda eki eldiń áleýeti óte zor. Sondyqtan aldaǵy ýaqytta osy baǵyttar boıynsha birlesip atqarylatyn jumystarǵa zańnamalyq turǵydan qoldaý kórsetýdiń bereri mol bolady dep esepteımiz», - dep jazady Senat tóraǵasy.
Málim etilgendeı, kezdesý barysynda, sondaı-aq eki eldiń Senattary arasynda parlamentaralyq yntymaqtastyqty damytýdyń 2021-2022 jyldarǵa arnalǵan jol kartasyna qol qoıyldy. Qujatta ózara baılanysty damytatyn naqty sharalar qamtylǵan. Soǵan sáıkes, aldaǵy ýaqytta óńiraralyq qarym-qatynasty keńeıtý, ekologııalyq problemalardy, onyń ishinde Aral teńizine qatysty máselelerdi sheshý, týrızmdi damytý, ınvestıtsııa tartý jáne basqa da baǵyttar boıynsha birlesken bastamalar qolǵa alynbaq.
Qazaqstandyq delegatsııanyń Ózbekstanǵa sapary aıasynda erteń taǵy birqatar shara josparlanǵan.
