Qazaq-orys shekarasynda PTR anyqtamasy joq 1300 shetel azamaty elge kirgizilmedi

PAVLODAR. QazAqparat - Pavlodar oblysynda memlekettik shekaranyń 4 avtomobıl ótkizý pýnktinde adamdardyń qozǵalysyna monıtorıng jalǵasyp jatyr, dep habarlaıdy QazAqparat.

Bul jaıynda Qazaqstanda koronavırýstyń taralýyna qarsy vedomstvoaralyq komıssııa málimet taratty.

«Shekteýler engizilgen sátten bastap oblysqa 100 668 adam keldi (orta eseppen táýligine 250-550 adam). PTR tekseristen ótý úshin 2 988 QR azamaty karantın statsıonaryna ornalastyryldy» delingen habarlamada.

Anyqtamasyz kelgen 1 307 shetel azamatyna shekaradan ótýge jol berilgen joq.

Sońǵy táýlikte shekara arqyly 480 azamat ótip, 14 adam karantın statsıonaryna jatqyzyldy.

Avtoótpe joldarynda vırýs juqtyrý jaǵdaılary anyqtalǵan joq.

Reseı, Qyrǵyzstan jáne Ózbekstannan kelgen 16 azamattyń elge kirýine tyıym salyndy.