Qazaq-orys halyqaralyq ýnıversıteti lıtsenzııasynan aıyrylýy múmkin
5 qarasha kúni «Qazaq-orys halyqaralyq ýnıversıteti» halyqaralyq joǵary oqý ornyna qatysty ákimshilik is qaraldy. Ákimshilik quqyq buzý týraly hattama men ákimshilik is materıaldaryn qaraý merzimi ýnıversıtettiń ótinishi boıynsha eki márte uzartylǵanyn aıta ketken jón.
«29 qazan kúni Bilim jáne ǵylym salasyndaǵy sapany qamtamasyz etý komıteti tóraıymynyń uıǵarymymen ýnıversıtettiń zańdy ókiline istiń qaralatyn orny men ýaqyty habarlandy. Ýnıversıtettiń zańdy ókili kelgen joq, osyǵan baılanysty isti zańdy tulǵanyń qatysýynsyz qaraý týraly sheshim qabyldandy. Tekseris qorytyndysy boıynsha osy qaýly kúshine engen sátten bastap atalǵan oqý ornyna qatysty 1 aı merzimge joǵary jáne joǵary oqý ornynan keıingi bilim berý baǵdarlamalaryn iske asyrý boıynsha lıtsenzııasyn toqtata otyryp, ákimshilik aıyppul salý týraly qaýly shyǵaryldy» delingen habarlamada.
Zańdy tulǵaǵa atalǵan eskertýlerdi joıý úshin 1 aı beriledi. Kemshilikter joıylmaǵan jaǵdaıda atalǵan oqý ornyn lıtsenzııasynan aıyrý úshin materıaldar sotqa jiberiledi.
