Qazaq óneriniń sańlaqtary: Sádýaqas Balmaǵanbetov
ASTANA.QazAqparat - Dombyrashy, kúıshi, Sádýaqas Balmaǵanbetov 1941 jyly Aqtóbe oblysynda týǵan. 1974 jyly Qurmanǵazy atyndaǵy Almaty memlekettik konservatorııasyn professor H.Tastanovtyń klasy boıynsha bitirgen. Ákesi - Balmaǵambet, Qazanǵap kúıshiniń dástúrli oryndaý mektebin jalǵastyrýshy, belgili dombyrashy bolǵan.
Sádýaqasty bala kezinde týysqan aǵasy Mataı Qýantaev (Qazanǵaptyń shákirti) ónerge baýlyp, qos ishektiń syryna qanyqtyrǵan. Munan keıingi jyldary Sádýaqas kúıshi óz sheberligin Qadiráli, Kelbet, Jalykesh, Qurmanǵalı syndy dombyrashylardan shyńdap otyrǵan.
Sádýaqas Balmaǵambetovtyń ózine ǵana tán oryndaý ereksheligi bar. Sheber oryndaýshy, kúıshi retinde ol halyq yqylasyna ıe boldy. Sonymen qatar, zertteýshi retinde de Qazanǵap kúılerin radıo men televızııada nasıhattap, halyqqa tanyta bildi. «Tiri Qazanǵap» atanǵan kúıshi Qazanǵap kúılerin notaǵa túsirip qana qoımaı, kúıtabaqqa jazdyrǵan. 2001 jyly QR eńbek sińirgen qyzmetkeri, professor Aıtjan Toqtaǵan men Qurmanǵazy atyndaǵy Qazaq ulttyq konservatorııasynyń aǵa oqytýshysy, kúıshi, zertteýshi Murat Ábýǵazynyń notalyq redaktsııalaýymen «Saz zergeri - Qazanǵap» atty kitap shyǵardy. «Qazanǵap kúılerin eshkim de ol sekildi tarta almaıtyn. Ásirese, Qazanǵaptyń «Jurtta qalǵan», «On segiz jasar Baljan qyz» kúılerin ol sııaqty oryndaý tipti, múmkin emes edi!..», - deıdi qazanǵaptanýshy, Qazanǵap atyndaǵy Shalqar saz mektebiniń ustazy Nurbolat Janamanov.
