Qazaq óneriniń sańlaqtary: Roza Rymbaeva
ASTANA.QazAqparat - Roza Rymbaeva - ánshi, Qazaqstannyń halyq ártisi, halyqaralyq konkýrstardyń laýreaty. 1957 jyly Semeı oblysynda týǵan.
Roza Rymbaeva Shyǵys Qazaqstan oblysyndaǵy Jańǵyztóbe stansasynda temirjolshylar otbasynda dúnıege kelgen. 1974 jyly Semeıdegi mýzykalyq ýchılışege túsip, 3 jyl oqydy. Budan keıin Almatydaǵy teatraldyq-kórkemóner ınstıtýtynda oqyp, ony 1984 jyly támamdaıdy. Almaty qalasyndaǵy teatrlyq kórkemdik ınstıtýttyń mýzykalyq dramalyq komedııasy fakýltetin bitirgen.
1976-1979 jyldary Respýblıkalyq Gúlder jastar - estradalyq ansambliniń solısi, 1977 jyly «Altyn Orfeıdi» jeńip alady. 1979 jyly - «Qazaqkontsert» birlestigi janyndaǵy «Araı» estradalyq ansambliniń solısi. Ánshiniń halyqaralyq deńgeıde tanymal bolýy S. Báıterekovtyń «Álııa» ánin oryndaýynan bastaldy. 1979 jyly Roza Rymbaeva Ystambulda ótken halyqaralyq ánshiler baıqaýynda laýreat atandy, 1983 jyly Kýbada ótken «Gala - 83» halyqaralyq baıqaýynda bas júldeni jeńip aldy.
Onyń oryndaýyndaǵy qazaq kompozıtorlary T. Ereshevtiń «Gúldene ber, týǵan jer», N. Tilendıevtiń «Kýá bol», B. Baıqadamovtyń «Aıgólek», J. Tuıaqbaevtyń «Atameken», T. Sarybaevtyń «Otandastar» ánderi tyńdaýshylardyń úlken yqylasyna bólengen. «Bir bala», «Sáýlem-aı», «Kebek», «Nazqońyr», «Ágýgaı» tárizdi halyq ánderin ol ózindik erekshelikpen oryndaıdy. Roza Rymbaeva sondaı-aq kınoaktrısa retinde de tanymal.
Kóptegen halyqaralyq konkýrstardyń Gran-prı ıegeri bolǵan Roza Rymbaeva 22 jasynda Qazaqstannyń eńbek sińirgen ártisi, 29 jasynda Qazaqstannyń halyq ártisi atandy. 1977-1979 jyldary «Pesnıa goda» festıvaliniń syynynda óner kórsetti jáne KSRO-nyń eń úzdik ondyǵy«Zvýkovaıa dorojka» hıt-paradynda (1978 j. 3-orynda Alla Pýgacheva jáne Sofııa Rotarýdan keıin) joǵary orynnan kórinip, úlken tanymaldylyqqa ıe boldy.
Qazaqstannyń halyq ártisi (1986), halyqaralyq konkýrstardyń laýreaty. «Qurmet» jáne «Parasat» ordenderiniń ıegeri. Qyrǵyzstannyń (2000) jáne Ózbekstannyń (1984) eńbek sińirgen ártisi.
