Qazaq óneriniń sańlaqtary: Muhamedjan Rústemov

ASTANA.QazAqparat - Muhamedjan Rústemov - halyq kompozıtory, ánshi, termeshi, Qazaqstan Respýblıkasynyń eńbek sińirgen qyzmetkeri. 1932 jyly Qyzylorda oblysynda týǵan. Almaty joǵarǵy partııa mektebinde oqyǵan.Rústemov 50-den asa ánniń avtory. Olardyń ishinde belgilileri: "Qımaımyn", "Aq halatty abzal jandar", "Saǵynysh", "Aıtolqyn", "Aq bosaǵa", "Armysyń baýrlarym alystaǵy" jáne taǵy basqalary.

Rústemov aqyn jáne kompozıtor Nartaı Bekejanovtyń shyǵarmashylyǵyn zertteýshi retinde belgili, ol 1983 jyly Nartaı atty qujatty povest jazdy, "Nartaı" áýenderi, N. Bekejanovtyń mýzykalyq jáne poetıkalyq murasy týraly "Terme" telehabarlar serııasyn uıymdastyrdy. Rústemov sondaı-aq, Nartaı shyǵarmalaryn úzdik oryndaýshy retinde de kópke tanymal.

1950 jyly Shıeli qystaǵyndaǵy XIV jyldyq Oktıabr atyndaǵy qazaq orta mektebin bitirip, eńbek jolyn sol jyly qazan aıynda Ońtústik Qazaqstan oblysy Saryaǵash aýdandyq komsomol komıtetinde mektep oqýshylary jáne pıoner uıymy bólimi meńgerýshisi qyzmetin bastaǵan.

1951 jyly maýsymda sol komsomol komıtetinde ekinshi hatshy bolyp saılanady.

1952 jyldyń tamyz aıynan 1953 jyldyń tamyzyna deıin ol Tashkent qalasyndaǵy №9 Ózbek qyzdary orta mektebindegi 11-pedagogıkalyq klasty bitirip, orys tili men ádebıeti páninen dáris beretin muǵalim bolyp shyǵyp, Ońtústik Qazaqstan oblysynyń Qaratas (Qazirgi Qazyǵurt) aýdanyna kelip, «Jigergen» eldi mekenindegi Molotov atyndaǵy ortalaý mektepke joldama alady. Col jyly qarashada aýdandyq komsomol komıtetine hatshy bolyp saılandy.

1955-1959 jyldary Almaty joǵary partııa mektebiniń jýrnalıstıka bólimin bitirip, 1959 jyldyń tamyz aıynan Ońtústik Qazaqstan oblystyq komsomol komıtetinde komsomoldar uıymdary bólimi meńgerýshisiniń orynbasary bolyp bekitiledi.

1960 jyldyń tamyzynda oblystyq partııa komıteti bıýrosynyń sheshimimen ol oblystyq kásiptik-tehnıkalyq bilim berý basqarmasy bastyǵynyń orynbasary qyzmetine bekitilip, sol qyzmette Ońtústik Qazaqstan ólkesi uıymdastyrylyp, qaıta qalypqa kelgende de sol jumysyn atqardy.

1968 jyly tamyzda oblystyq partııa komıtetiniń úgit-nasıhat bóliminiń nusqaýshysy qyzmetine bekitilip, onda 1984 jylǵa deıin istep, sol jyldyń naýryzynan oblystyq partııa komıtetiniń muraǵatyna meńgerýshi bolyp aýystyryldy, onda 1991 jylǵa deıin istedi. Kompartııa taraǵanda Búkilodaqtyq Lenın atyndaǵy balalar qorynyń oblystyq uıymynda tóraǵa qyzmetin atqaryp, 1992 jyly maýsymda Halyqaralyq «Qazaq tili» qoǵamynyń oblystyq uıymyna tóraǵa bolyp saılandy.

1997 jyldyń qyrkúıek aıynan M. Áýezov atyndaǵy Ońtústik Qazaqstan Memlekettik ýnıversıtetiniń dotsenti, Shymkent mýzykalyq kolledjine termeden shákirtter daıarlaıtyn ustaz boldy.

«Nartaı» atty derekti povesi (1983, «Jalyn») jaryq kórdi. G.Baıdýkovtyń «Chkalov» atty kitabyn qazaqshaǵa aýdaryp, 1995 jyly «Jalyn» baspasynan shyǵardy.

M. Rústemov V.I. Lenınniń 100 jyldyǵyna oraı «Eńbektegi erligi úshin», «Eńbektegi eren eńbegi úshin» medaldarymen marapattalǵan. «Qazaqstan Respýblıkasyna eńbek sińirgen mádenıet qyzmetkeri» (1992) ataǵyna ıe, oblys ákiminiń «Zerde» stıpendııasynyń ıegeri (1998), Qazaqstan Respýblıkasynyń Jazýshylar, Jýrnalıster odaqtarynyń múshesi bolǵan, Shıeli qystaǵynyń «Qurmetti azamaty» (1992), «Respýblıkalyq dárejedegi zeınetker».