Qazaq óneriniń sańlaqtary: Keńes Dúısekeev

1974 - 1976 jyldary "Gúlder" ansambliniń bas dırıjeri jáne mýzyka jetekshisi, 1976 - 1979 jyldary "Qazaqkontsert" gastroldik-kontsert birlestiginiń mýzyka jetekshisi, 1975 - 1984 jyldary Qazaq teledıdary mýzyka redaktsııasynyń bas redaktory bolyp qyzmet atqarǵan. Dúısekeevtiń jetekshiligimen "Tamasha", "Halyq - talant qaınary", "Shabyt", "Jastarǵa arnalǵan mýzykalyq keshter", "Mýzyka áleminde", t.b. teledıdarlyq baǵdarlamalar shyǵaryldy. 1984 - 1997 jyldary Qazaqstan memlekettik teleradıo komıteti estradalyq-sımfonııa orkestriniń kórkemdik jetekshisi jáne bas dırıjeri boldy. 1997 jyldan "Qazaqkontsert" gastroldik-kontsert birlestiginiń kórkemdik jetekshisi. Ol - "Tolǵaý" sımfonııasynyń (1984), "Jalańtós batyr" sımfonııa poema-kartınasynyń (1996), "O, dúnıe" kantatasynyń (1997), "Jyl mezgilderi" romanstar tsıkliniń (1991), "Mádı", "Aqqý Jibek" mıýzıkliniń, "Aldar kóse" operettasynyń, sımfonııa-kontsertter, aspaptarǵa arnalǵan kontsertter, kameralyq orkestrge shyǵarmalar, sonata, rapsodııa, varıatsııalar jáne 200-den astam ánderdiń avtory. Dúısekeev ánderin R.Rymbaeva, N.Esqalıeva, M.Júnisova, A.Meıirbekov, N.Ónerbaev, M.Dáýletbaqova, t.b. ánshiler oryndap júr.

Dúısekeevtiń mýzykasynda qazaqtyń ulttyq dástúri qazirgi zamandyq mýzyka tilimen úndesip, jańa sıpatqa ıe bolady. Kompozıtor qoltańbasynyń aıryqsha qasıetteri kóńilge qonymdylyǵynda, mýzyka tiliniń mánerliliginde. Onyń shyǵarmashylyǵynyń bul erekshelikteri myna dúnıelerinde anyq belgi beredi: Kameralyq orkestrge arnalǵan "Jaılaýdaǵy tań", "Kóshý", hor kapellasyna arnalǵan "O, týǵan jer". Dúısekeev án janrynda da óz baǵyn synap, halyq júreginen jol tapty. Onyń ánderin jas ta, kári de yqylaspen tyńdaıdy. Onyń "Sálem saǵan, týǵan el" áni estrada juldyzdary R. Rymbaeva men N.Esqalıevanyń repertýarynan beldi oryn alǵan.