Qazaq óneriniń sańlaqtary: Ermek Serkebaev

Ánshi operalyq portretterdiń ádemi galereıasyn jasady. E. Serkebaev somdaǵan obrazdar arasynda uly Abaıdyń tulǵasy، Brýsılovskıı men Rahmadıev operalaryndaǵy Er Tarǵyn jáne Alpamys obrazdary bar. Onyń repertýarynda sondaı-aq, qazaq, orys halyq ánderi, kameralyq shyǵarmalar oryn alǵan. Ol qazaqtyń vokaldy qazirgi zamandyq mýzykasyn úzdik oryndaýshy.

Ermek Bekmuhameduly Serkebaev 1926 jyly 4 shildede, Qyzyljar qalasynda dúnıege kelgen.

Úshinshi synyptan keıin Almatydaǵy № 54 mektepte oqýyn jalǵastyrǵan Ermek Serkebaev jetinshi synypqa kóshkende P. I. Chaıkovskıı atyndaǵy mýzykalyq ýchılışege aýysty. 1941-1943 jyldary P. Chaıkovskıı atyndaǵy Almaty mýzykalyq ýchılışesinde skrıpka klasy boıynsha oqyǵan Serkebaev otbasynyń materıaldyq jaǵdaıy qıyndaǵandyqtan, oqýyn tastap ketýge májbúr boldy. Taǵdyr ony radıoǵa dıktorlyqqa ákeldi, oǵan qosa kınostýdııada qyzmet atqardy. Onyń operaǵa kelýine hor jetekshisi Anton Maksımovıch Moskalenko áser etti. Serkebaevtyń skrıpkada oınaı biletinin estigen Moskalenko ony horǵa ánshilikke shaqyrdy. Ermek birden áıgili operalardaǵy klassıkalyq arııalardy oryndaı bastady. Máskeýde ánderin úntaspaǵa jazdyrdy. Sol kezde Levıntanmen tanysady.

1946 jyly konservatorııaǵa qabyldanady. E. Serkebaev konservatorııany 1951 jyly Kýrganovtyń synybynda támamdaǵan soń opera jáne balet teatryna oralady. Konservatorııany bitirer jyly Abaı rólin oryndaıdy. Odan ári «Evgenıı Onegın» operasynda - Evgenıı, «Travıatadaǵy» - Jermon rólderin joǵary dárejede shyrqaıdy. Kelesi róli - «Sevıl shashtarazyndaǵy» - Fıgaro.

1951 jyly Qurmanǵazy atyndaǵy Almaty konservatorııasyn (vokal boıynsha) bitirgen. Stýdent kezinde Abaı atyndaǵy Opera jáne balet teatrynyń shyǵarmashylyq ujymyna qyzmet istegen. Abaı partııasyn (A. Jubanov pen L. Hamıdı, «Abaı») oryndaǵan. 1973 jyly Almaty konservatorııasynyń jeke daýysta án aıtý kafedrasynyń oqytýshysy bolǵan.

Serkebaev oryndaǵan partııalardyń ishinde Qojaǵul, Amangeldi (M. Tólebaev, «Birjan men Sara»; M.Tólebaev jáne E.Brýsılovskıı, «Amangeldi»), Abaı, Serke (A.Jubanov pen L.Hamıdı, «Abaı»; S.Muhamedjanov, «Aısulý»), Tarǵyn, Artem (E.Brýsılovskıı, «Er Tarǵyn», «Dýdaraı»), Onegın, Eletskıı (P.Chaıkovskıı, «Evgenıı Onegın», «Qarǵanyń mátkesi»), Petrýchchıo (V.Shebalın, «Asaýǵa tusaý»), Fıgaro (Dj.Rossını, «Sevıl shashtarazysy»), Valentın («Faýst»), t.b. bar. Ánshi repertýarynda qazaqtyń halyq ánderi, orys jáne shet el kompozıtorlarynyń shyǵarmalary bar. Shet elderde (Rýmynııa, Pákistan, Frantsııa, Úndistan, Qytaı, Belgııa, Kýba, Shveıtsarııa, Shvetsııa, Fınlıandııa, t.b.) óner kórsetken. Kınoǵa da túsken («Bizdiń súıikti dáriger», «Taqııaly perishte», t.b.). 7-shaqyrylǵan KSRO Joǵarǵy Keńesiniń, 8-11-shaqyrylǵan Qazaq KSR Joǵarǵy Keńesiniń depýtaty. Vokalıster konkýrsynyń (Býdapesht, 1953) laýreaty. KSRO Memlekettik syılyǵynyń (1977) jáne Qazaq KSR Memlekettik syılyǵynyń (1972) ıegeri. «Mýzyka» nomınatsııasy boıynsha 2000 j. «Tarlan» syılyǵyn jeńip alǵan. «Otan» , 2 márte Lenın, Qazan revolıýtsııasy, Eńbek Qyzyl Tý ordenderimen jáne medaldarmen marapattalǵan.