Qazaq óneriniń sańlaqtary: Aıgúl Úlkenbaeva
ASTANA. QazAqparat - Aıgúl Narımanqyzy Úlkenbaeva (23.1.1962 jyly týǵan, Atyraý oblysy Isataı aýdany Chapaev aýyly) - kúıshi-dombyrashy, Qazaqstannyń eńbek sińirgen ártisi (1998).
Almaty qalasyndaǵy mýzyka ýchılışesin (1981), odan keıin Almaty memlekettik konservatorııasynyń (qazirgi Qazaq ulttyq konservatorııasy) halyq aspaptary fakýltetin (1986) bitirgen.
Shyǵarmashylyq eńbek jolyn oqyp júrgen kezinen, ıaǵnı Qazaqtyń akademııalyq halyq aspaptar orkestri quramynda (1979 - 1989) dombyrashy bolýmen bastaǵan Úlkenbaeva solo-oryndaýshyǵa deıingi úzdik kásiptik-sheberlik bıigine kóterildi. Onyń kúıshilik-oryndaýshylyq repertýarynda halyq kúıleri ("Aqsaq qulan", "El aırylǵan", t.b.), qazaqtyń halyq kompozıtorlary (Dáýletkereı, Dına Nurpeıisova, Qazanǵap, Qurmanǵazy, Mahambet, sondaı-aq mańǵystaýlyq kúıshiler: Esbaı, Esir, Qulshar, Óskenbaı, t.b.), osy zamanǵy kompozıtorlar (, N.Tilendıevtiń "Aqqýy", A.Jaıymovtyń "Kúı anasy" men "Shalqymasy") shyǵarmalary men orys, shet el klassıkalyq týyndylary bar.
Onyń 2002 jyly "Qulaǵyńnan ketpesin" atty jeke shyǵarmashylyq keshi Almatydaǵy Respýblıka saraıynda, 2012 jyly "Aıgúl - kúıge bar álem tamsanady..." atty jeke shyǵarmashylyq keshi Almatydaǵy Abaı atyndaǵy Opera jáne balet teatrynda, al 2013 jyly osy atalymmen jeke shyǵarmashylyq keshi Astanadaǵy "Qazaqstan" ortalyq kontsert zalynda ótti.
1993 jyldan Qazaq ulttyq konservatorııasynda (2002 jyldan dotsent) jáne 2006 jyldan "Aıgúl Úlkenbaevanyń mektep-stýdııasynda" ustazdyq qyzmetpen aınalysady.
Úlkenbaevanyń oryndaýyndaǵy kúıler "Kúı - ana" aýdıo-kasseta (2000 j),"Qulaǵyńnan ketpesin" toptamalyq 2 dıski (2002 j) jáne "Qulaǵyńnan ketpesin" beıne-kasseta (2003 j) ,"Aq Sholpan", "Ireń" dıskileri (2008 j), "Kúı ǵumyr" atty kitap (2011 j), "Aıgúl - kúıge bar álem tamsanady..." atty dıski (2013 j) jaryq kórdi.
Kúıshi-dombyrashy Aıgúl Úlkenbaevanyń jetken jetistikteriniń bir parasyn atap aıtar bolsaq tómendegideı;
1981 jyly 3-shi Respýblıkalyq Jas oryndaýshylar baıqaýynda - 1-shi oryn, 1983 jyly Qurmanǵazy atyndaǵy 1-Respýblıkalyq oryndaýshylar baıqaýynda - 3-shi oryn, 1986 jyly Baký qalasynda ótken Gadjıbekov atyndaǵy halyq aspaptarynda oryndaýshylarynyń halyqaralyq baıqaýynda 3-shi oryn aldy. Al 1985 jyly Respýblıkalyq "Jiger" festıvaliniń júldegeri atandy.1992 jyly - "Daryn" Memlekettik jastar syılyǵynyń laýreaty, 1998 jyly Respýblıkalyq kúıshiler saıysynyń Bas júldesin enshiledi. Sondaı-aq 1998 jyl Qazaqstan Respýblıkasynyń eńbek sińirgen ártisi ataǵyna ıe bolǵan.
Aıgúl Úlkenbaeva búgingi kúnde talantty oryndaýshy hám kúıshi retinde halyq qurmetine bólengen óner sańlaǵy.
