Qazaq óneri tarlandarynyń biri, kompozıtor Erkeǵalı Rahmadıev dúnıeden ozdy
ASTANA. 9 sáýir. QazAqparat - Búgin qazaq óneriniń shoqtyǵy bıik tarlandarynyń biri, kompozıtor, KSRO halyq ártisi, Qazaq KSR Memlekettik syılyǵynyń laýreaty, qazaq mýzykasynyń sımfonııalyq kúı janrynyń negizin salýshylardyń biri, professor Erkeǵalı Rahmadıev dúnıeden ozdy.
E. Rahmadıev 1932 jyly 1 tamyzda Semeı oblysynyń (qazirgi Shyǵys Qazaqstan oblysy) Shubartaý aýdanyndaǵy Mádenıet aýylynda dúnıege kelgen. 1957 jyly Almaty konservatorııasyn bitirdi.
Qazaq KSR ónerine eńbek sińirgen qaıratker (1967). Qazaq KSR halyq ártisi (1976). KSRO halyq ártisi (1981). 2010 jyly oǵan «Qazaqstannyń Eńbek Eri» ataǵy berildi. 27 jyl boıy Qazaqstan Kompozıtorlar odaǵynyń tóraǵasy, KSRO Kompozıtorlar odaǵynyń hatshysy boldy.
Onyń shyǵarmalarynda qaharmandyq-patrıottyq taqyryp negizgi oryn alady, onda qazaq halyq mýzykasynyń baı murasy men klassıkalyq mýzyka óneri sheber paıdalanylǵan. Rahmadıevtiń sımfonııalyq, operalyq, vokaldy-aspaptyq, kameralyq shyǵarmalary kásibı ulttyq ónerdiń órisin keńeıtip, janrlyq salalaryn baıytty. Kompozıtordyń «Qamar sulý», «Alpamys», «Tyń tynysy» operalarynyń, «Amangeldi», «Tolǵaý», «Daırabaıdyń kúıi», «Meıram kúni», «Qudasha-dýman», «Ortpa» sımfonııalyq poemalary, «Sálem saǵan Aıastan», «Merekelik kantata», «Konstıtýtsııa týraly poema» kantatalary, horǵa arnalǵan vokaldyq shyǵarmalary, kóptegen án-romanstary Qazaqstanda jáne shetelderde joǵary baǵasyn aldy.
