Qazaq ómiri Londonda sahnalandy
Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty ózekti maqalasy qoǵamda keńinen talqylanyp jatyr. Búgingi óskeleń urpaq bolashaqqa basqan qadamdaryn qalaı saralap, buqaralyq sanany qalaı ózgertetinimiz jan-jaqty baǵalanǵan týyndy shet elderde de qyzyǵýshylyq tanytyp otyr. Muny QR Mádenıet jáne sport mınıstrligi tarapynan uıymdastyrylyp jatqan túrli sharalar barysynda da, ásirese shet elderde ótip jatqan aıtýly is-sharalar ótkizgende aıqyn ańǵaramyz.
Buǵan taıaýda jazýshy, dramatýrg Dýlat Isabekovtyń «Jaýjúrek» pesasy London teatrynda saxnalanǵanynda taǵy kóz jetkizdik. Dramatýrgtyń 75 jasqa kelýine oraı uıymdastyrylǵan bul sharaǵa koreı, aǵylshyn teatrlary da qatysqan eken. Osyndaı bedeldi ózge elder teatr maıtalmandary arasynda bizdiń otandyq týyndymyz, ózimizdiń ártisterimiz oryndaýynda sahnaǵa shyǵýy qýantady.
Sonymen, Balýan Sholaqtaı segiz qyrly, bir syrly el ardaqtysy pesa jelisiniń basty tulǵasyna aınalǵan qoıylym Eýropa mádenıetiniń bedeldi oshaǵy - Londonda saxnalandy. Dál osy qoıylymnyń Ulybrıtanııa astanasyndaǵy alqaly festıval shymyldyǵyn ashýy de tegin emes. Bir ǵana keıipker arqyly qazaq xalqynyń bastan keshken aýyr taǵdyry, keshegi ımperııalyq pıǵyl men surapyl saıasatty akterler eki saǵatta kórermenniń kóz aldyna ákelipti. Sonymen qatar qazaq dalasynyń darxan minezin, ónerin Balýan Sholaqtyń rólin somdaǵan akter Erlan Bilál tamasha jetkizdi, deıdi teatr óneriniń sarapshylary.
Ádebıettanýshy Sara Kopleı qazaq jazýshysy D. Isabekov týyndylarymen buryn da tanys ekenin, al myna «Jaýjúrek» pesasynyń sátti sahnalanýy ony jańa bir qyrynan tanýyna yqpal etkenin jasyrmaıdy. «Jalpy Dýlat Isabekovtyń shyǵarmalary tarıxı dúnıeni alystan ári týra jetkizedi, meniń ony súısinip oqıtynyma da sol sebep», - dep ol aǵynan jarylady.
Brıtan-qazaq qoǵamynyń tóraǵasy Rýpert Gýdman da akterlerdiń sheberligine tánti bolǵanyn aıtady. «Qoıylymda eldiń tarıxy da, mádenıeti de bar. Munda tek qazaqtyń jaǵdaıy ǵana emes, xalyqaralyq másele de qozǵaldy. Jalpy qazaq teatrynyń Londonǵa kelip óner kórsetýi jaqsy dástúr», deıdi ol.
Qazaq teatrynyń Londonǵa jol tartýy dástúrge aınaldy deýge bolady, deıdi festıval uıymdastyrýshylary. Bıyl 75 jasqa kelip otyrǵan jazýshy, dramatýrg Dýlat Isabekovtyń shyǵarmasy munda osymen ekinshi ret saxnalanyp otyr eken.
Qazaq ónerin, ádebıetin, tarıxyn osyndaı teatr festıvali arqyly álemge tanytý - bizdiń Prezıdentimiz Nursultan Ábishuly Nazarbaev halqymyzdyń aldyna qoıǵan mańyzdy mindet - rýxanı jańǵyrýdyń bir kórinisi, dedi óz sózinde Qazaqstan Respýblıkasynyń Ulybrıtanııadaǵy elshisi Erlan Ydyrysov.
- Negizi elshi men emes, naǵyz elshi - óner adamdary, mýzykant, akter, sportshylar. Óıtkeni, mádenıetimiz arqyly, sporttyq jetistikterimiz arqyly bizdi el tanıdy, óner arqyly eldiń rýxanı jandúnıesin jetkizetin, júregin jetkizetin de osy ádebıet, teatr tulǵalary, - dedi Erlan Ydyrysov.
Osy festıval aıasynda Dýlat Isabekovtyń pesalar jınaǵy aǵylshyn tilinde jaryq kórdi. Myna alǵashqy nusqasy dál osy Brıtanııa parlamenti ǵımaratynda London lordyna tabys etildi. Al Stokxaýz teatrynda bastaý alǵan qazaq teatrynyń festıvali endi bir apta boıy Braıdýell teatrynda koreı, aǵylshyn akterleriniń qatysýymen ótedi.
Jazýshy Dýlat Isabekov munyń barlyǵynyń táýelsizdiktiń arqasy ekenin aıtýda. Sonymen qatar tanymal jazýshy dál qazir elimizde keńinen qanat jaıǵan rýhanı jańǵyrý úderisiniń de halyqty shynaıy serpiltkenin, ulttyq tarıhymyzdy tyńnan saralap, sana-sezimimizdi de qazaq eliniń erteńine úlken senimmen qaraýǵa jetelep otyrǵanyn sheteldikter aldynda tilge tıek etti. 
