Qazaq neırohırýrgi Parıjde eki kúrdeli otany sátti jasady
PARIJ. KAZINFORM – Qazaqstandyq neırohırýrg Myńjylqy Berdiqojaevtyń jetekshiligimen Frantsııada eki azamatqa kúrdeli ota jasaldy. Al ol operatsııany álemniń úzdik dárigerleri tikeleı efırde baqylady.
Kúni keshe jasalǵan qos operatsııa da sátti ótip, naýqastar esin jıyp úlgeripti. Bul týraly Parıjde ótip jatqan Halyqaralyq konferentsııaǵa attanǵan maman Jibek Joly telearnasynyń «Búgin LIVE» baǵdarlamasynda málimdedi.
– Barlyq operatsııa sátti ótti. Otany dúnıejúzinen jınalǵan, qan tamyr ishimen emdeıtin neırohırýrgter tamashalaǵan edi. Birinshi operatsııamyz – basynda arterıovenozdyq malformatsııasy bar, qan tamyrlary jyrtylǵan aýyr jaǵdaıdaǵy naýqasqa jasaldy. Qazir naýqas oıandy, bári oıdaǵydaı. Ekinshi naýqasymyzdyń basyndaǵy mı qan tamyrlarynda anevrızmasy bar jáne mıǵa baratyn tamyrlary qatty tarylǵan. Ol kisige jasalǵan ota da oıdaǵydaı ótti. Operatsııany komandamyzben birge jasadyq. Biz mundaı operatsııalardy apta saıyn jasaımyz. Ota barysyn meniń YouTube arnamnan da kórsetemiz. Biraq onda naýqastardyń aty-jónin jarııalamaımyz, – deıdi dáriger.
Aıta keteıik, jaqynda almatylyq dárigerler jańa týǵan nárestege kúrdeli operatsııa jasady.