Qazaq mýzykasy qashan Meta-ǵa qaıta shyǵady – mınıstr jaýaby

ASTANA. KAZINFORM –  Ádilet mınıstri Erlan Sársembaev Úkimet otyrysynan keıin ótken baspasóz máslıhatynda qazaq mýzykasy qashan Meta-ǵa qaıta shyǵatyny týraly paıymyn aıtty.

- Byltyr kúzde eki taraptyń da kelisimi boıynsha kelisimsharttar kúshin joıǵan bolatyn. Alaıda bizdegi málimet boıynsha, búgingi tańda múddeli taraptardyń arasynda kelissóz júrip jatyr. Ádilet mınıstrligi olardyń yqpaldastyǵyna zańnama aıasynda retteý turǵysynan ǵana qatysady. Qaı tarapty bolsyn májbúrleý nemese belgili bir áreketti tańý nıetimiz joq, - dedi Erlan Sársembaev.

Sondaı-aq, ol qazaqstandyqtardyń avtorlyq quqyǵy men zııatkerlik menshigin qorǵaý isin jetildirý úshin tsıfrlyq platformany iske qosatyndaryn málim etti.

- Osy platformanyń arqasynda kez kelgen qazaqstandyq avtor nemese avtorlyq quqyq ıesi tsıfrlyq formatta kelisimshart bekite alady. Keıin sol kelisimsharttyń qalaı iske asyp jatqanyn platformadaǵy jeke kabıneti arqyly baqylap, qansha tólem jasalǵanyn, týyndysy neshe ret oryndalǵanyn kórip otyrady, - dedi mınıstr.

Sondaı-aq, ol Meta men qazaqstandyq avtorlar arasyndaǵy máseleniń qanshaǵa sozylatynyn boljaýdyń ózi qıyn ekenin atap ótti.

- Kelisimshart qatynastarynyń erkindigi deıtin uǵym bar. Kelissózder protsesine memlekettiń aralasýyna jáne shart jasasýǵa májbúrleýge jol berilmeıdi. Másele belgisiz merzimge sozylýy múmkin. Óıtkeni túpkilikti sheshim taraptardyń kelisimge qol jetkizýine baılanysty. Kelisimshart qatynastary sóz bolyp otyrǵandyqtan memleket naqty merzimder belgilep, mindettemeler júkteı almaıdy, - dedi ol.

Buǵan deıin ol qazaq mýzykasynyń Meta-dan joıylýyn «ujymdyq basqarý salasyndaǵy kemshilik» dep baǵalaǵan edi.