Qazaq mýzykasy COP31 konferentsııasynyń qonaqtaryn tánti etti
ASTANA. KAZINFORM — Antalıada ótip jatqan COP31 klımat konferentsııasynda kúmbirlegen qazaq kúıleri sheteldik qonaqtardyń nazaryn aýdardy, dep habarlaıdy Kazinform agenttiginiń Ankaradaǵy menshikti tilshisi.
Qazaqstandyq ónerpazdar kórme kesheniniń ortalyq bóliginde óner kórsetti. Munda túrli elderdiń ulttyq pavılondary ornalasyp, sheteldik delegatsııalardyń qatysýymen túrli is-sharalar uıymdastyrylady.
Ulttyq kıim kıgen ónerpazdar konferentsııa qonaqtaryna qazaqtyń uly kompozıtory, kúıshi Qurmanǵazy Saǵyrbaıulynyń kúıleri men halyqqa keńinen tanymal basqa da shyǵarmalardy oryndap berdi. Kúı tyńdaýǵa jınalǵan COP31 konferentsııasynyń qatysýshylary ónerpazdardy telefonǵa túsirip, erekshe qoshemet kórsetti.
Qazaqstannyń ekologııa jáne tabıǵı resýrstar mınıstri Álibek Qýantyrov pen delegatsııa músheleri de kontsertti tamashalady.
Mýzykalyq baǵdarlama sheteldik qonaqtardy qazaqtyń ulttyq ónerimen tanystyryp, tól mádenıetimizdiń baı murasyn pash etti. Sondaı-aq dástúrli mýzyka til men ult aıyrmashylyǵyna qaramastan, halyqtardy jaqyndastyryp, mádenı baılanys ornatýǵa dáneker bola alatynyn kórsetti.
Qazaqstan COP31 konferentsııasy aıasynda ulttyq mádenıetin de tanystyryp, klımattyq bastamalar, jasyl tehnologııalar men ınvestıtsııalyq jobalarǵa qosa, tarıhı-mádenı murasyn sheteldik qonaqtarǵa pash etti. Osy arqyly el ulttyq qundylyqtardyń halyqaralyq dıalogtaǵy ornyn aıqyndady.
Buǵan deıin BUU-nyń COP31 klımattyq konferentsııasy 9 qarashada Antalıa qalasynda bastalǵany habarlanǵan bolatyn.
