«Qazaq munaı jáne gaz ınstıtýty» AQ bas dırektory U.Qarabalın munaı salasynyń jas mamandaryna sheberlik sabaǵyn ótkizedi
ASTANA. 13 jeltoqsan. QazAqparat - «QazMunaıGaz» UQ AQ-nyń Kadr saıasatyn júzege asyrý aıasynda, kompanııanyń adam resýrstaryn basqarý departamenti QR munaı-gaz salasynda tanymal mamandarymen sheberlik saǵattary syndy is-sharalar ótkizýde.
Atalǵan sharanyń maqsaty - QMG kompanııasynyń zamanǵa saı daıarlanǵan mamandaryna jaǵdaı jasaý, munaı jáne gaz salasynda ózderin qyzyqtyrǵan saýaldarǵa beıresmı jaǵdaıda jaýap tabýyna yqpal etý. Sondaı-aq, jetekshilerinen iske asyrylyp jatqan jobalarmen tanysyp, olardyń keleshegi jaıly maǵlumat alý, ǵalymdar men ardagerlerdiń, jekelegen kóshbasshy azamattardyń jetken jetistigimen tanysý.
Osy oraıda kompanııa baspasóz qyzmetininiń atap ótýinshe, búgin elordadaǵy «Beıjiń saraıy» qonaq úıinde «Qazaq munaı jáne gaz ınstıtýty» AQ bas dırektory Uzaqbaı Qarabalın «QazMunaıGaz» kompanııalarynyń mamandaryna arnap sheberlik sabaǵyn ótkizedi. Shara aıasynda U.Qarabalın munaı salasynda oryn alǵan tarıhı oqıǵalar jaıly, sondaı-aq munaı salasynyń jáne qoǵamnyń búgingi damýy týraly áńgime qozǵaıdy. Kezdesý pikirtalas túrinde tok-shoý ispetti moderatordyń qatysýymen ótedi.
QazAqparat anyqtamasy: Uzaqbaı Qarabalın - tehnıka ǵylymdarynyń doktory, QR UIA akademıgi. Eńbek jolyn kásipshilikterde qatardaǵy jumysshy retinde bastaǵan. 1997 jyly «Qazaqoıl» UMK birinshi vıtse-prezıdenti, al 2003 jyly «QazMunaıGaz» UK AQ prezıdenti bolyp taǵaıyndaldy. «KSRO jer qoınaýyn barlaý úzdigi» belgisimen, «Qurmet», «Barys» ordenderimen marapattalǵan. QR jer qoınaýynyń qurmetti barlaýshysy. 80 astam astam maqala jazǵan ǵalym, 5 ónertapqyshtyq jańalyq avtory.
