Qazaq memlekettik tsırkiniń 45 jyldyq mereıtoıy Qazaq handyǵynyń 550 jyldyǵyna arnalady
Qazaq memlekettik tsırkiniń ashylǵanyna 24 shildede 45 jyl tolady. Osy merekege oraı eki bólimnen turatyn mereıtoılyq baǵdarlama ázirlengen.
Alǵashqy, halyqaralyq bólimde álemdik tsırk ártisteri óner kórsetse, ekinshi bólim Qazaq handyǵynyń 550 jyldyǵyna arnalady.
«Qazaq handyǵynyń 550 jyldyǵyna oraı biz teatrlandyrylǵan tsırktik qoıylym qoıamyz. Qazir tarıhı taqyrypqa baılanysty stsenarıı jazyp jatyrmyz. Onda janrlardyń sıntezi: horeografııa, teatr, balet, akrobatıka elementteri bolady. Qoıylym kóne ańyz jelisine negizdeledi. Spektaklge arnap ulttyq kostıýmder tigilip, ulttyq mýzyka jazylady. Mýzykany jandy oryndaý úshin Qazaq Ulttyq óner akademııasynan vokalısterdi irikteýdi oılap otyrmyz. Biraq bul másele áli sheshilgen joq», - dedi D.Dosbatyrov.
Sondaı-aq, tsırk dırektory alǵashqy bólimde Ispanııada ótken halyqaralyq tsırk festıvalinen «Kúmis pil» júldesin jeńip alǵan Andreı men Álııa Qanahınder «Sen jáne men» nómirin oryndaıtynyn jetkizdi.
«Atalǵan kompozıtsııada lıbrettony ánshi Karına Abdýllına jandy daýyspen oryndaǵanyn qalar edik. Qazir onymen kelissózder júrgizilip jatyr», - dedi D.Dosbatyrov.
