Qazaq memleketi aman turǵanda, qazaq tili jasaı beredi - QR Prezıdenti

ULYTAÝ. QazAqparat – Memlekettik tildiń tuǵyry kún ótken saıyn nyǵaıyp keledi. Bul týraly Ulytaý oblysynda ótip jatqan Ulttyq quryltaıdyń otyrysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Memlekettik rámizderimizge, ana tilimizge degen qurmet árqashan joǵary bolýǵa tıis. Qazaq tiline qatysty alańdaýshylyq eldegi jaǵdaıdy durys túsinbegennen týyndap otyr. Shyn máninde, burynǵy ahýal men qazirgi kezeńdi múlde salystyrýǵa kelmeıdi. Memlekettik tildiń tuǵyry kún ótken saıyn nyǵaıyp keledi. Oǵan qosa, álemniń basty aqparat quraldary qazaqsha shyǵyp jatyr», - dedi Qasym-Jomart Toqaev.

Osy oraıda Prezıdent jaqynda áıgili «APPLE» kompanııasy qazaq tilin iOS-tyń tilder júıesine qosqanyn eske saldy.

«Álemniń 40 tilinde taraıtyn «NICKEL ODEON» telearnasy qazaqsha kórsetile bastady. Jastardyń bastamasymen «NATIONAL GEOGRAPHIC» jýrnaly 6 jyldan beri ana tilimizde jaryq kórýde. Osyndaı kóptegen jaǵymdy jańalyqtar bar. Sondyqtan, qatty alańdaýǵa negiz joq dep oılaımyn. Desek te, osy saladaǵy jumysymyzdy dańǵaza jasamaı, tabandylyqpen júrgizýimiz qajet.

Qazaq memleketi aman turǵanda, qazaq tili jasaı beredi. Buǵan eshqandaı kúmán bolmaýy kerek», - dedi Memleket basshysy.