Qazaq mektepteriniń bedeli men ataq-abyroıyn túrik lıtseılerindeı asqaqtatýǵa kúsh salý qajet - Májilis Tóraǵasy

Búgin QR Parlamenti Májilisinde ótip jatqan «Memlekettik til - el birliginiń kepili» atty ǵylymı konferentsııa barysynda sóz sóılegen Májilis Tóraǵasy Oral Muhamedjanov osylaı málim etti, dep habarlaıdy QazAqparat.

«Tilge qatysty taǵy bir nazar aýdaratyn jaıt - endigi jerde sany ulǵaıǵan qazaq mektepteriniń bedeli men básekege qabilettiligin arttyrý máselesi. Ras, qazaq mektepteriniń ártúrli jarystarda alyp júrgen oryndaryna, basqa da kórsetkishterine qaraǵanda, ózge mektepterden kem emes sııaqty. Al baıybyna baryp qaraıtyn bolsańyzdar, bul kórsetkishter negizinen jekelegen qabiletti balalardyń úlesine tıip júrgenin kóremiz. Qudaıǵa shúkir, qazaqtyń daryndy balalary az emes. Biraq, meniń aıtpaǵym - qazaq mektepteriniń jalpy deńgeıin kóterý. Jasyratyny joq, balasyn qazaq mektebine namysqa tyrysyp berip jatatyn jaǵdaılar da az emes. Osynyń ózi-aq kóp nárseni ańǵartady. Qazaq mektepteriniń bedeli men ataq-abyroıy bizdegi túrik lıtseılerindeı asqaqtap tursa, qazaq qana emes basqa ult ta balasyn qazaq mektebine berýge yntaly bolar edi. Qazaq mektepteriniń qajetine basa kóńil bólinip otyrǵan dál qazirgideı kezeńde olardyń deńgeıin meılinshe kóterý - osy salada qyzmet etip júrgen barsha azamattarymyzdyń qasterli mindeti ári ult aldyndaǵy paryzy», dedi O. Muhamedjanov.

Sonymen qatar, Májilis Tóraǵasy memlekettik tildi laıyqty deńgeıde oqytyp-úıretýdi aralas nemese basqa tilde oqytatyn mektepterden de talap etý kerektigin atap ótti. «Ózge ult mektepterinde oqıtyn balalar mektep bitirgende qazaq tilin ıgerip shyǵatyn jaǵdaıǵa qol jetkizýi tıis. Joǵary oqý oryndarynda da qazaq tilin oqytýdaǵy maqsat osyndaı bolýy shart», dedi ol.