Qazaq mektepteri men JOO kitaphanalary sheteldegi qandastarymyzdyń jańa kitaptarymen tolyǵyp jatyr - T. Mamashev
ALMATY. 8 jeltoqsan. QazAqparat /Erlik Erjanuly/ - 2012 jyly sheteldegi qazaq-jazýshylarynyń shyǵarmashylyǵy boıynsha Dúnıejúzi qazaqtary qaýymdastyǵynyń «Atajurt» baspa ortalyǵynan 10-nan astam kitap shyǵarý josparlanýda.
Ol jaıly qaýymdastyqtyń Tóralqa tóraǵasynyń 1-orynbasary Talǵat Mamashev búgin Almatyda Baılanys jáne aqparat mınıstrliginiń «Ádebıettiń áleýmettik mańyzdy túrlerin basyp shyǵarý» baǵdarlamasy boıynsha sheteldegi qazaq jazýshylarynyń avtorlyǵymen jaryq kórgen kitaptardyń tanystyrylymynda aıtty.
«Dástúrli shara aıasynda bıyl «Atajurt» baspasynan 8 kitap basylyp shyqty. Olardyń ishinde Qytaıdaǵy, Ózbekstandaǵy, Mońǵolııadaǵy qalamgerlerdiń prozalyq jáne poezııalyq shyǵarmalary men mońǵolııalyq ǵalym Hamaı Júkeldiń aýdarmasymen Anand Amardyń «Kóshpendilerdiń qysqa tarıhy» degen zertteý eńbegi bar. Búgin biz olardy Almatydaǵy qazaq mektepteri men joǵary oqý oryndarynyń kitaphanalaryna tegin taratamyz», - deıdi Talǵat Asyluly. Onyń aıtýynsha, bul is-shara birinshiden syrttaǵy aǵaıyndy elge tanystyrý, ekinshiden qazaq mektepteri men joǵary oqý oryndarynyń kitaphanalaryn qoldaýǵa baǵyttalǵan. Qazirgi tańda bul eńbekter elimizdiń 14 oblysy men Astana men Almaty qalalarynyń ortalyq kitaphanalarna jáne Ózbekstan, Qaraqalpaqstan, Reseı jáne Mońǵolııadaǵy ulttyq-mádenı ortalyqtarǵa taratyldy. Aldaǵy ýaqytta endi ózge elderdegi qandastardyń da qolyna tıetin bolady.
«Aldaǵy jyly biz Qytaı, Ózbekstan. Reseı jáne Mońǵolııadan bólek Túrkııa men Eýropa elderinen de avtorlardy tartamyz ba dep oıymyz bar. Buǵan deıin «Mońǵolııadaǵy qazaqtar», «Qytaıdaǵy qazaqtar», «Ózbekstandaǵy qazaqtar» degen monografııalyq 3 ǵylymı eńbek shyǵarǵanbyz. Ǵylymı ortalyǵymyz bul jumysty aldaǵy ýaqytta jalǵastyra beredi. Qazir «Reseıdegi qazaqtar» degen jınaq daıyndalyp jatyr», - dedi Talǵat Mamashev.
