Qazaq medıtsınasynyń ańyzy Nına Kaıýpova dúnıeden ótti

ALMATY. KAZINFORM – Kórnekti dáriger, ǵalym, ustaz jáne qoǵam qaıratkeri Nına Kaıýpova ómirden ótti. Bul týraly Asfendııarov atyndaǵy QazUMÝ baspasóz qyzmeti habarlady.

Nına Kaıýpova – qazaq medıtsınasynyń damý tarıhynda óshpes iz qaldyrǵan tulǵa. Ol elimizdegi qazirgi akýsherlik-gınekologııalyq qyzmettiń qalyptasýyna eleýli úles qosyp, Akýsherlik, gınekologııa jáne perınatologııa ǵylymı ortalyǵynyń negizin qalaǵandardyń biri boldy.

Nına Amırovna medıtsına salasynda jarty ǵasyrdan astam ýaqyt eńbek etti. Osy jyldar ishinde 30 myńnan astam balanyń ómirge kelýine sebepker boldy. 25 ǵylym doktoryn, 40 ǵylym kandıdatyn tárbıelep shyǵardy. Ǵylymı eńbekteriniń qatarynda 19 monografııa men 400-den astam maqala bar. Sońǵy jyldary da belsendiligin joǵaltpaı, jetekshi ǵylymı qyzmetker ári salalyq jýrnaldyń bas redaktory retinde jumysyn jalǵastyrdy.

- S.J.Asfendııarov atyndaǵy Qazaq ulttyq medıtsına ýnıversıtetiniń ujymy Nına Amırovna Kaıýpovanyń dúnıeden ozýyna baılanysty onyń otbasy men týǵan-týystaryna qaıǵyra kóńil aıtady. Nına Kaıýpova kásibı biliktiligimen, tereń parasatymen, bıik adamgershiligimen, ustazdyq meıirimimen jáne elge degen adaldyǵymen este qalady. Onyń ómir joly halyqqa qaltqysyz qyzmet etýdiń jáne shynaıy berilgendiktiń jarqyn úlgisi, - delingen ýnıversıtet jazbasynda.

Eske salaıyq, buǵan deıin elde 9 myńnan astam akýsher eńbek etetinin jazǵanbyz.