Qazaq mádenıetiniń elementteri Bakýdegi qaıyrymdylyq jármeńkesinde usynyldy

BAKÝ. QazAqparat - Bakýdegi dıplomatııalyq korpýs óziniń ulttyq atrıbýtıka úlgilerin Ázerbaıjanda alǵash ret SІM uıymdastyrǵan halyqaralyq qaıyrymdylyq jármeńkesinde usyndy, dep habarlaıdy QazAqparat menshikti tilshisi.

Bir shańyraq astyndaǵy biregeı bazar Bakýde akkredıttelgen ondaǵan dıplomatııalyq vedomstvolardy jınady.

Іs-sharaǵa Ázerbaıjan, Qazaqstan, Qytaı, Túrkııa, Ýkraına, Sýdan, Túrikmenstan, Malaızııa, Saýd Arabııasy, Egıpet jáne basqa da kóptegen elder qatysty.

Geıdar Álıev atyndaǵy sport-kontsert kesheninde jármeńke qonaqtaryna shet elderdiń ulttyq taǵamdary men kádesyılarynyń keń assortımenti usynyldy.

Kelýshiler taýarlardy elshilikterden sımvoldyq baǵamen satyp alý múmkindigine ıe boldy, al barlyq túsken qarajatty qaıyrymdylyq maqsatta, atap aıtqanda múmkindigi shekteýli balalardyń qajettilikterine jumsaý josparlanǵan.

Bizdiń elshiligimizdiń kómegimen uıymdastyrylǵan Qazaqstan pavılonynda dástúrli qazaq taǵamdary qatysýshylar arasynda úlken qyzyǵýshylyqqa ıe boldy. Dıplomattar daıyndaǵan otandyq ónimder saýdanyń alǵashqy saǵattarynda satyldy.

Otandyq stendte qazaq ulttyq taǵamdarynyń negizgi quramdas bóligi bolyp tabylatyn et, nan-toqash jáne kondıterlik ónimder kópshilikke usynyldy. Baýyrsaq, samsa, manty, chak-chak, jent, qazy, shokolad jáne taǵy basqalar Ázerbaıjanda keńinen tanymal taǵamdar ekeni jasyryn emes.

Shara sońynda lotereıa oınatylyp, kontserttik baǵdarlama uıymdastyryldy.

Qaıyrymdylyq bazarynyń qatysýshylary mundaı aktsııalardy ótkizý basqa elder men halyqtardyń mádenıeti men dástúrin jaqynyraq bilýge, birlik pen ózara túsinistik atmosferasyn qurýǵa, adamdarǵa jylýlyq pen jaqsylyq ákeletinin atap ótti.

Aktsııa Ázerbaıjan men BUU arasyndaǵy seriktestiktiń 30 jyldyǵyna jáne BUU kúnine arnalǵan.