Qazaq mádenıetin shetelge tanytý úshin ulttyq kontent qalyptastyrý kerek - sarapshy
«Memleket basshysy «Bolashaqqa baǵdar: Rýhanı jańǵyrý» maqalasynda qazaqstandyq mádenıetti shetelge tanytý jaıly atqan bolatyn. Osy baǵytta memleket mynadaı mindetterdi atqarýy tıis dep oılaımyn. Eń aldymen mádenıet qaıratkerleriniń oı-pikirin, túıtkildi máselelerin tyńdaý kerek. Sapaly ulttyq kontent qalyptastyryp ony shetelde tanytý jumystarymen aınalysqan abzal. Memleket bul jerde túrli mádenı birlestikterdiń arasyndaǵy altyn kópir bolýy tıis», - dedi Asqar Nursha.
Sondaı-aq, dóńgelek ústel barysynda eldegi jańǵyrý jumystary aıasyndaǵy otandyq buqaralyq mádenıettiń róli men zamanaýı mádenıettiń adamdardyń básekege qabilettiligin arttyrýǵa qanshalyqty áser ete alatyndyǵy týraly pikir almasty.
«Buqaralyq mádenıet memleket halqynyń rýhanı damýyndaǵy deńgeılik kórsetkish qana emes, sonymen birge ol kóptegen adamdardyń talǵamyn, mádenı qajettilikterin, oılaý júıesin damytady. Buqaralyq mádenıette qalyptasqan obrazdar zamanaýı qoǵamnyń qalyptasýyna áser etedi. Alaıda buqaralyq mádenıettiń birtutastyqty saqtaýdaǵy oń áseri tek jeke mádenı kodtyń barynda ǵana múmkin bolady. Buqaralyq mádenıet dástúrli qalyp pen álemdik jahandanýdaǵy jańa tendentsııalar arasyndaǵy baılanystyrýshy bolýy kerek», - dedi pikirtalas barysynda ÁESI Almatydaǵy keńsesiniń jetekshisi Asqar Nursha.
Onyń aıtýynsha, buqaralyq mádenıet Qazaqstandaǵy qoǵamdyq ómirdiń negizgi bóligine aınalyp barady.
«Dástúr men zamanaýı úrdisterdiń astasýy qazaqstandyq qoǵam ómir súrip jatqan mádenı landshaftty qalyptastyrdy. Nursultan Nazarbaev óziniń «Bolashaqqa baǵdar: Rýhanı jańǵyrý» atty maqalasynda Qazaqstanda atqarylyp jatqan saıası jáne ekonomıkalyq jańǵyrý qoǵamdyq sananyń jańǵyrýynsyz ótýi múmkin emestigin aıtty. Qoǵamdyq ómirdi jańǵyrtý saıası jáne ekonomıkalyq jańǵyrýdyń basty negizi bolýy kerek», - dedi A.Nursha.
