Qazaq mádenıeti jaıly jazatyn Ásem Sıaotsı Qytaıdyń memlekettik syılyǵyna usynyldy
Seısenbi kúni Qytaıdyń Lý Sın atyndaǵy memlekettik syılyǵyn taǵaıyndaý jónindegi komıssııasynyń sheshimimen, konkýrstyń alǵashqy irikteýinen ótken 70 shyǵarmanyń tizimi jarııalandy. Bul tizimge Qytaıdyń Altaı aımaǵynda turatyn, Ásem Sıaotsı degen laqap atpen tanymal qytaı jazýshysy Chjoý Chjıhýeıdiń «Muńsyz jaılaý jazbalary» atty esseler jınaǵy da enip otyr.
Buǵan deıin «Muńsyz jaılaý», «Altaımen júzdesý», «Serigim Mıtan», «Sotqar balaqaı Bek» sekildi onǵa jýyq kitaby jaryq kórgen Chjoý Chjıhýeıdiń esimi sońǵy kezde Qytaıdyń ádebıet salasynda jıi aıtylyp júr. Buǵan deıin de birneshe márte memlekettik deńgeıdegi syılyqty qanjyǵasyna baılaǵan jas jazýshynyń shyǵarmalary oqyrman tarapynan jyly qabyldanyp keledi. Osy joly memlekettik syılyqqa usynylǵan esseler jınaǵynda, avtor «Muńsyz jaılaý – kóshpendilerdiń materıaldyq emes mádenı muralarynyń etnografııalyq turaǵy» jaıly syr shertedi.
Chjoý Chjıhýeı - Úrimjidegi Shynjań óner ınstıtýtynyń túlegi. Biraz jyldan beri Altaı aımaǵynyń mádenıet salasynda eńbek etip, kóshpendilerdiń materıaldyq emes mádenı muralaryn qorǵaý, muraǵattaý, zertteý jumystarymen aınalysyp keledi. Jumys barysynda, mádenı qundylyqtardyń mańyzyn tanytyp, mánin ashatyn kórneki nysandardy qorǵaý men saqtaýǵa jetkilikti mán berilmeıtinin eskerip, osydan on jyl buryn óz qarajatyna QHR Altaı qalasynyń Shyǵys Qoby qystaǵynda qazaqtyń etnografııalyq kelbetin tanytatyn muralar kollektsııasy jınaqtalǵan shyǵarmashylyq baza ashýdy qolǵa alady. Onyń shyǵarmalarynyń deni osy aýylda jazylǵan jáne kóbinese qazaqtyń baı mádenı dástúri jaıly oı tolǵaýymen qundy. Bul kúnde atalǵan úı-murajaıǵa jergilikti bılik jeke etnografııalyq murajaı mártebesin berip, ol qaladaǵy eń tanymal týrıstik nysandardyń birine aınalyp úlgergen.
Atap óter jaıt, Lý Sın atyndaǵy memlekettik syılyq – Qytaıdyń ádebıet salasyndaǵy eń mártebeli syılyqtarynyń biri. 1995 jyldan beri turaqty túrde berilip keledi. Buǵan deıin Altaı jáne Altaı qazaqtary týraly birneshe eńbek jazǵan qytaı jazýshysy Lı Tszıýan da 2017 jyly atalǵan syılyqqa ıe bolǵan edi.
