Qazaq mádenıeti men óneri aýyr qazaǵa ushyrady
Q.Teljanov 1937 jyly KSRO Sýretshiler akademııasy janyndaǵy daryndy balalarǵa arnalǵan kórkemsýret mektebine qabyldandy. 1947 jyly Almaty kórkemsýret ýchılışesin (pedagog L.Leontev), al 1953 jyly Lenıngrad keskindeme, músin jáne sáýlet ınstıtýtynyń keskindeme fakýltetin (akademık M.Avılovtyń sheberhanasy) bitirdi. 1953-1958 jyldary Almaty teatr-kórkemsýret ýchılışesinde oqytýshy boldy. 1964-1968 jyldary - Qazaqstan Sýretshiler odaǵy basqarmasynyń tóraǵasy, KSRO Sýretshiler odaǵynyń basqarma múshesi jáne hatshysy boldy. 1973-1986 jyldary - Á.Qasteev atyndaǵy Memlekettik óner murajaıynyń dırektory qyzmetin atqardy.
1978 jyly Almaty memlekettik teatr-kórkemsýret ınstıtýtyndaǵy oqytýshylyq qyzmetin bastady, 1993-2000 jyldary Qazaqstan memlekettik kórkemsýret akademııasynda, 2000 jyldan Qazaq ulttyq kórkemsýret akademııasynda qyzmet atqardy. 1996 jyly ol Qazaq KSR Memlekettik syılyǵynyń laýreaty atandy, al 1981 jyly professor ataǵy berildi.
Teljanovtyń shyǵarmalarynda halyq ómiri, ulttyq sıpat bederlendi. Ol qazaqstandyqtardyń kúndelikti turmysy jaıly shaǵyn poetıkalyq kartınalardan tarıhı jáne qazirgi zaman taqyryptaryndaǵy keń tynysty irgeli polotnolarǵa aýysty. Ol «Dombyra áýeni», «Atameken», "Búrkit salý", "Qyz qýý" jáne basqa da asqaq poezııaǵa toly týyndylardyń avtory. Óziniń shyǵarmashylyǵymen Q.Teljanov Qazaqstannyń beıneleý ónerin damytýǵa qomaqty úles qosty, onyń jumystary Máskeýdegi Tretıakov galereıasynda, Á.Qasteev atyndaǵy Memlekettik óner murajaıynda, sondaı-aq Eýropa men Azııanyń jeke kollektsııalarynda saqtaýly tur.
6-7-shi shaqyrylǵan Qazaq KSR Joǵarǵy Keńesiniń depýtaty. «Otan», «Parasat», Eńbek Qyzyl tý, «Qurmet belgisi» ordenderimen jáne KSRO Joǵarǵy Keńesi Tóralqasynyń medaldarymen marapattalǵan.
Qazaq mádenıeti men óneriniń qaıratkeri Qanapııa Teljanovtyń jarqyn beınesi bizdiń esimizde máńgi saqtalady.
Qazaqstan Respýblıkasynyń Mádenıet jáne aqparat mınıstrligi
Qazaqstan Sýretshiler odaǵy
