Qazaq qyzynyń myqty ekenin álemge kórsetkim keledi – Jibek Qulymbetova
ALMATY. QazAqparat – Tarıhta erlermen birge atqa qonyp, el qorǵaǵan arýlarymyz az bolmaǵan. Al búgingi kúni el mereıin asqaq etip, ár salada úlken jetistikterge jetip, kók baıraǵymyzdy bıikke jelbiretip júrgen arýlarymyz da az emes. Olardyń biri – Jibek Qulymbetova. Ol – djıý-djıtsýdan 7 dúrkin, grepplıng kúresinen álem chempıony atanǵan tuńǵysh qazaq qyzy. 9 jasynan bastap djıý-djıtsýmen aınalysyp, nebary 16 jasynda sportta bıik belesterge jetken balýan qyzdy áńgimege tartqan edik.
«Men 2006 jyly Almaty qalasynda ómirge keldim. Djıý-djıtsýmen inim aınalysatyn. Keıin anam «Sport – densaýlyq kepili, bul qyz da úıde bos otyrmasyn» dep, meni de osy sportqa beredi. Osylaısha 9 jasymnan bastap djıý-djıtsýmen aınalysa bastadym. Alǵashqy bapkerim – Nursultan Orynbasarov. Onyń arqasynda atalǵan sporttyń qyr-syryn meńgere bastadym», - deıdi Jibek.
Onyń aıtýynsha, djıý-djıtsý sporty qyzdar úshin óte yńǵaıly sport túri.
«Munda uryp, soǵý, tebý joq, aýyr soqqylardy da almaısyń. Munda tek aýyrtý ádisteri qoldanylady. Jetistikterim jaıly aıtar bolsam, djıý-djıtsýdan jeti dúrkin, grepplıngten bir ret álem chempıony atandym. Qazir kúlgin belbeýdiń ıegerimin», - deıdi ol.
Jibek sporttan bólek bos ýaqytynda da paıdaly istermen aınalysady.
«Sporttan bólek án aıtamyn, bı bıleımin, bos ýaqytymda kitap oqımyn, TikTok túsiremin. Qazir mektepte oqımyn, bıyl 11 synypqa kóshtim. Mektep bitirgen soń Sport týrızm ýnıversıtetine oqýǵa túskeli júrmin», - deıdi sportshy.
Jibektiń alǵa qoıǵan maqsat, armandary oryndalyp kele jatyr.
«Bala kúngi armanym djıý-djıtsýdan álem chempıony ataný bolatyn. Allaǵa shúkir, armandarym oryndalyp jatyr. Endigi maqsatym – Olımpıada, Azııa oıyndarynyń chempıony bolý jáne álemge qazaq qyzynyń qandaı myqty ekenin kórsetip, dáleldegim keledi», - dedi palýan qyz.
Óziniń úlgi tutar tulǵasy – bapkeri Nursultan Orynbasarov.
«Meniń úlgi tutar adamym – bapkerim Nursultan Orynbasarov. Onyń kómegi men qoldaýy bolmasa búgingi jetistikterge múmkin jetpes pe edim. Nursultan aǵaı meni djıý-djıtsýǵa ǵashyq etip, álem chempıony etti. Oǵan óte rızamyn. Onyń úmitin aqtaýǵa ary qaraı da tyrysamyn», - deıdi Jibek.
Jibektiń oıynsha, elimizde djıý-djıtsýdan jaqsy óner kórsetip júrgen ul-qyzdar jeterlik.
«Olardyń biri retinde bizdiń klýbtyń sportshysy Aıtpanbet Samat aǵaıdy aıtar edim. Sebebi, ol djıý-djıtsýdan qońyr belbeý arasynda álem chempıony, grepplıngten álem chempıony jáne ACB (eı-sı-bı) álem chempıonatynyń eki dúrkin chempıony boldy. Búginde óte myqty sportshy bolyp sanalady», - deıdi sportshy qyz.
Jibektiń aldaǵy ýaqytta shákirt tárbıelemek oıy bar.
«Dál qazir shákirt tárbıelep júrgen joqpyn. Aldaǵy ýaqytta shákirt tárbıelemek oıym bar. Jalpy búginge deıin qyzdar arasynda sheberlik saǵatyn ótkizgen bolatynmyn. Ol Qazaqstan Táýelsizdiginiń 30 jyldyǵyna oraı uıymdastyrylǵan bolatyn. Sheberlik saǵaty óte qyzyqty ótken edi», - dedi chempıon qyz.
Ol sporttyń paıdasy týraly oıyn aıtty.
«Sport adamdy eńbekqorlyqqa, maqsatqa jetýge, ómirde kezdesetin qıyndyqtarmen kúresýge, eń bastysy otansúıgishtikke, patrıotızmge úıretedi dep oılaımyn», - deıdi Jibek Qulymbetova.
Eske salaıyq, Jibek Qulymbetova – Almaty oblysynan Saǵadat Nurmaǵambetov atyndaǵy «Saǵadat batyr – QTT» sport klýbynyń tárbıelenýshisi. Djıý-djıtsýdan jeti dúrkin, grepplıngten álem chempıony, sambodan álem chempıonatynyń qola júldegeri, kóptegen halyqaralyq jáne respýblıkalyq jarystardyń jeńimpazy. Ol 2018 2019 2021 2022 2023 jyldary álem chempıony atanǵan edi.
Ol sondaı-aq bıyl tamyz aıynda Astanada ótken Ju-Jitsu Youth World Championship Astana 2023 álem chempıonatynda altyn medalǵa ıe bolǵan edi.
«Djıý-djıtsý boıynsha álem chempıonaty elimizde tuńǵysh ret ótip otyr. Ol biz úshin úlken oqıǵa jáne men óz elimde altyn medaldi jeńip alǵanyma óte qýanyshtymyn. Jarystyń aldynda qatty ýaıymdaǵan edim, sebebi óz halqyńnyń aldynda óner kórsetý saǵan úlken jaýapkershilik artady. Óte baqyttymyn», - degen edi Jibek Qulymbetova.
